Чилилик аёл ўғирланган қизларини 45 йилдан кейин топди

Чилида 1979 йилда эгизак қизлари ўғирлаб кетилган аёл 45 йилдан сўнг биринчи марта улар билан учрашди. CNN телеканали уларнинг таъсирли тарихини сўзлаб берди.

64 ёшли Мария Вероника Сото ва унинг қизлари Мария Беатрис ва Аделия Роузнинг эҳтиросларга бой учрашуви эгизаклар Италиядан қайтиб келганидан кейин Чилидаги Консепсион шаҳри аэропортида бўлиб ўтди.

Сото қизларини охирги марта саккиз ойлик пайтида кўрган. Эгизаклар ўзларини Чилида асраб олинганини доимо билган, аммо онаси кимлигидан бехабар бўлган.

19 ёшли Сотонинг фарзандлари 1979 йилда, Чили генерал Аугусто Пиночет диктатураси остида бўлганида туғилган. Аёл сўзларига кўра, шифокорга режали ташрифдан сўнг, унга 8 ойлик қизлари текширувдан ўтиш учун қолиши кераклиги айтилган. Уларга тиббий ёрдам ва овқатланиш бўйича ёрдам ваъда қилинган. Аммо кўп ўтмай, унинг сўзларига кўра, ҳукумат клиникаси онасини гўёки уларни нотўғри овқатлантирганликда айблаб, болаларни олиб қўйган.

Полиция аёлга судга боришни маслаҳат берган. У ерда болаларни италиялик эр-хотин асраб олгани маълум бўлган. Кейинчалик Сото қизларининг туғилганлик ҳақидаги гувоҳномалари ўзгартирилганини ва уларда ҳақиқий ота-оналаридан ҳеч бирининг исми ёзилмаганини билган.

2020 йилда Сото бутун дунё бўйлаб ноқонуний асраб олинган болаларни қидираётган «Nos Buscamos» («Бир-биримизни излаяпмиз») нодавлат ташкилоти билан боғланганида, она ва болаларни бирлаштиришнинг узоқ ва машаққатли йўли бошланди. Унинг асосчиси, болалигида ноқонуний асраб олинган Констанса дел Рио аёлга ДНК тестини топширишни тавсия қилган, Сото дарҳол шундай қилди.

Ташкилот аёлнинг қизларини 5 йилда топишга муваффақ бўлди. Сотонинг айтишича, у бир кун келиб қизлари билан учрашиш умидини ҳеч қачон йўқотмаган, аммо бунинг учун 45 йил кутишга мажбур бўлишини билмасди.

10 сентябр куни эгизаклар Италиядан Чилига учиб, Консепсионга қўнди. Сото ва қизларининг самимий учрашувига кўплаб одамлар, журналистлар ва амалдорлар ҳам гувоҳ бўлди.

«Онажонингиз сизларни ҳар доим излаган», деди Сото қизларини бағрига босиб.

Чили расмийларига кўра, Пиночет диктатураси даврида 1973 йилдан 1990 йилгача минглаб чақалоқлар биологик оналаридан ўғирлаб кетилган ва асосан АҚШ ва Европадан келган жуфтликларга асраб олиш учун сотилган. Чилида уларни «Сукунат болалари» деб аташади.

Баъзи чақалоқлар заиф, қашшоқ ва ҳимоясиз аёллардан тортиб олинган. Сото ва қизлари билан содир бўлганидек, фарзандликка олиш агентликларига ноқонуний равишда сотилган.

Ҳозирги вақтда Чили ҳукумати бундай ҳолатларни аниқлаш ва айбдорларни жазога тортишга ҳаракат қилмоқда. Аммо, кўплаб ҳолларда даъво муддати аллақачон ўтиб кетган. Бошқа ҳолатларда чақалоқларни ўғирлаш ортида турганлар аллақачон вафот этган.