Чилида президентлик сайловида консерватор Каст ғалаба қозонди

Ўта ўнг қарашли, 59 ёшли Хосе Антонио Каст Республикачилар партиясидан президент сайловининг иккинчи тури якунларига кўра ғалаба қозонди. Якшанба, 14 декабр куни, сайлов комиссияси 83 фоиз овозлар саналганидан сўнг маълум қилишича, уни тахминан 59 фоиз сайловчи қўллаб-қувватлаган.

Унинг асосий рақибаси — Чили Коммунистик партияси аъзоси, ҳокимиятдаги сўл-марказчи иттифоқ номзоди, 51 ёшли Жанетт Хара мағлубиятни тан олган. У тахминан 41 фоиз овоз олган ва телефон орқали суҳбатда рақибини табриклаган.

Каст президент лавозимини учинчи уринишда эгалламоқчи. Сайловолди кампаниясида у жиноятчилик ва ноқонуний миграцияга қарши қаттиқ чоралар кўришни асосий шиор қилиб олган.

Кастнинг ота-онаси — Майкл Каст Шинделе ва Ольга Рист Хагшпил асли Бавариядан. Отаси вермахт лейтенанти ва Германия Миллий-социалистик немис ишчилар партияси аъзоси бўлган, 1950 йилда Германиядаги денацификация жараёни вақтида Чилига қочиб кетган.

Биринчи турдан кейинги нутқида Каст шундай деган: «Биз ватанимизни тиклаймиз». Тўққиз фарзанднинг отаси ва қатъий католик бўлган Каст аллақачон юз минглаб ноқонуний муҳожирларни — асосан венесуэлаликларни депортация қилишга ваъда берган.

Хосе Антонио Каст 1973–1990 йиллардаги Аугусто Пиночет диктатурасидан кейин Чилида президентлик лавозимини эгаллаган илк ўта ўнг сиёсатчи бўлади.

Каст Сантяго шаҳрида туғилган, шаҳарнинг Католик университетида ҳуқуқшунослик йўналишида ўқиган ва AFP агентлиги эслатишича, 30 йилдан бери сиёсат билан шуғулланиб келади. У абортларни тақиқлаш, шунингдек фавқулодда контрацепцияга қарши чиқишни қўллаб-қувватлаган, ажрашиш ва эвтаназияга қарши бўлган.

Ўн фарзанднинг энг кичиги бўлган Каст ота-онасидан колбаса маҳсулотлари ишлаб чиқариш билан боғлиқ муваффақиятли бизнесни мерос қилиб олган.

АҚШ давлат котиби Марко Рубио Чилининг сайланган президентини ғалаба билан табриклаган. «Қўшма Штатлар минтақавий хавфсизликни мустаҳкамлаш ва савдо алоқаларимизни фаоллаштириш мақсадида унинг маъмурияти билан ҳамкорлик қилишни умид қилади», — деб ёзган Рубио X ижтимоий тармоғида. Ўз навбатида Аргентина президенти Хавер Милей ҳам Кастнинг «ишонарли ғалабасидан улкан қувонч» ҳис қилганини билдирган.

Биринчи турда саккиз нафар номзод иштирок этган. 2012 йилдан бери илк бор Чилида сайловларда овоз бериш мажбурий бўлди. Хосе Антонио Каст 11 март куни лавозимига киришади.