Метан шохобчаларга газ етказиб бериш вақтинча қисқартирилди

Ўзбекистонда 9-12 феврал кунлари метан шохобчаларга газ узатиш қисқартирилган. Бу ҳақда Ўзэнергоинспекция маълум қилди.

Инспекциянинг 12 феврал кунги ахборотида айтилишича, “ҳаво кескин совиб кетган даврларда” табиий газ биринчи навбатда аҳоли хонадонлари ва ижтимоий соҳа объектларига етказилади, газ қувурлари ва қурилмаларидаги босим меъёр даражасига кўтарилганидан сўнггина босқичма-босқич АГТКШларга ҳам тўлиқ етказиб берилиши белгиланган.

“Жорий йилнинг 9-12 феврал кунлари республиканинг барча ҳудудларида ташқи ҳаво ҳароратининг кескин совиб кетиши натижасида табиий газга эҳтиёж ортганлиги сабабли маҳаллий ҳокимликлар томонидан киритилган графикларга асосан АГТКШларга табиий газ етказиб бериш вақтинчалик қисқартирилган”, – дейилади Энергоинспекция хабарида.

Эслатиб ўтамиз, 10 феврал куни “Бухоро–Урал” магистрал газ қувурининг Бухоро вилоятидан ўтган қисмида ёрилиш кузатилиб, ёнғин чиққан эди.

Энергетика вазирлиги шу куни ёнғин тўлиқ ўчирилганини маълум қилди. “Табиий газ захира газ қувури орқали ҳеч бир узилишсиз ўтказиляпти ва унинг истеъмолчиларга етказилиши штат режимида давом этмоқда”, дейилади вазирлик баёнотида.

“Ўзтрансгаз” юзага келган носозликни таъмирлаш ишлари олиб борилаётганини хабар қилган. Таъмирлаш ишлари якунлангани ёки қачон якунланиши ҳақида ҳозирча хабар берилмади.