Франция ташқи ишлар вазири Россиянинг G8'га қайтишини рад этди

Франция ТИВ раҳбари Россия иштирокида G8 форматига қайтишга қарши чиқди. Аввалроқ АҚШ президенти Доналд Трамп бунга чақирган эди. Германия Ташқи ишлар вазирлиги ҳам буни рад этди.

Фото: Nicolas Tucat/AFP/Getty Images

Франция ташқи ишлар вазири Жан-Ноэл Барро Россия иштирокида G8 форматига қайтиш ғоясига қўшилмайди. Бу сўзларни сиёсатчи 16 феврал, якшанба куни Франциянинг LTI телеканалига берган интервюсида айтди.

«Бугун буни тасаввур қилиб бўлмайди», деди Барро. Унинг сўзларига кўра, «Катта еттилик» «энг йирик ва ривожланган демократик давлатлар»ни бирлаштирган бўлса, Россия «камроқ демократияга ўхшаб кетмоқда».

Шу билан бирга, Барронинг сўзларига кўра, агар Украинада «адолатли ва мустаҳкам тинчлик»га эришилса, Москва иштирокида G8 форматига қайтиш имкониятини инкор этиб бўлмайди.

Доналд Трамп - Россиянинг G8'га қайтиши тарафдори

АҚШ президенти Доналд Трамп 13 феврал куни Россия иштирокида G8 форматига қайтиш тарафдори эканини айтди. У 1997 йилдан 2014 йилгача G8 аъзоси бўлган. Қримдаги воқеалардан кейин бирлашма G7 форматида ишлашда давом этди.

Германия ташқи ишлар вазири Анналена Бербок Трампнинг таклифига қарши чиқди. Унинг таъкидлашича, «агар биз ҳаммамиз тинчлик йўлига қайтсак ва бу босқинчилик сиёсати ўзгарса, бу, албатта, турли соҳаларда ҳамкорликни қайта тиклашимиз мумкинлигини англатади».