Илон Маск «энг ақлли сунъий интеллект»ни тақдим этишга ваъда берди

Маск ўзининг Grok номли нейротармоғи устида 2023 йилдан бери иш олиб боради. Олдинроқ у ChatGPT чатботини яратган OpenAI компаниясини сотиб олишга қарийб 100 млрд доллар таклиф қилган, аммо рад жавобини олган эди.

Фото: Reuters

Америкалик бизнесмен Илон Маск ўзининг xAI компаниясига тегишли Grok нейротармоғининг учунчи версияси тақдим этилишини эълон қилди.

«Ердаги энг ақлли сунъий интеллект», — деб ёзади у ўзининг Х ижтмоий тармоғидаги саҳифасига.

Қайд этилишича, нейротармоқда 17 февраль куни Тинч океани вақти билан соат 20:00 да тақдим этилади.

Матнлар билан ишлашга мўлжалланган Grok’ни такомиллаштириш устидаги ишлари 2023 йилдан бери давом этмоқда. Чатботдан Х ижтимоий тармоғининг премиум обуначилари фойдалана олади. Илон Маскнинг таъкидлашича, унинг сунъий интеллекти «Х платформаси орқали реал вақт режимида ахборотдан фойдаланиш имкониятига эга, бу эса нейротармоқни бошқа дастурлардан устуворлигини таъминлайди», шунингдек, у сарказм ва юморга бой матнларни ҳам ярата олади.

11 феврал куни Маск ChatGPT’ни яратган OpenAI компаниясини 97,4 миллиард долларга сотиб олиш таклифини билдирган эди. OpenAI раҳбари Сэм Алтман «Йўқ, раҳмат, аммо хоҳласангиз биз Twitterʼни 9,74 миллиард долларга сотиб олишимиз мумкин», дея жавоб қайтарган. Илон Маск Twitterʼни 2022 йилда 44 миллиард долларга сотиб олган ва унинг номини Хʼга ўзгартирганди.

2015 йилда Алтман OpenAI’га Маск билан бирга асос солган. Компания «сунъий интеллект технологиялари тадқиқотига мўлжалланган нотижорий компания» сифатида тузилган. Аммо 2019 йилда компания тижорий фаолиятга ўтиши сабаб Маск лойиҳани тар этган ва ҳатто OpenAI’ни судга берганди.

Ҳозирда OpenAI Япониянинг Softbank’идан 40 миллиард долларгача инвестиция жалб этиш бўйича музокаралар олиб бормоқда. NYT манбаларига кўра, банк ва бошқа инвесторлар GPT яратувчисини 300 миллиард долларга баҳоламоқда.

#Илон Маск #сунъий интеллект