Номаълум шахс Тошкентдаги 71-мактабда «қирғин» уюштириш билан таҳдид қилди

Тошкент шаҳар Мактабгача ва мактаб таълими бошқармаси ижтимоий тармоқларда 71-сонли мактаб ўқувчилари хавфсизлигига таҳдид қилингани юзасидан тарқалган хабарларга муносабат билдирди.

Ушбу хабарларда мактаб ҳудудида совуқ қурол билан «қонли қирғин» уюштирилиши таъкидланган. «Биз қамоқдан ҳам, ҳукуматдан ҳам қўрқмаймиз, биз ўз амбицияларимизни қаноатлантирган ҳолда ўз мақсадимиз томон борамиз», — дейилади хабарда.

Қайд этилишича, Мирзо Улуғбек туманидаги 71-сонли умумтаълим мактабида таълим жараёнлари бошқарма томонидан тўлиқ назоратга олинган. Бугун мактабнинг биринчи ва иккинчи навбатидаги дарслар белгиланган жадвал асосида ўтказилган. Тармоқларда тарқалган аноним ёзилган хабар ўз исботини топмаган.

«Юқоридаги аноним ёзилган хабар ўз исботини топмади. Мактаб маъмурияти, Миллий гвардия, психолог-инспектор иштирокида ота-оналар ва ўқувчилар билан тушунтириш ишларини амалга ошириб, бу каби асоссиз хабарларга ишонмасликка ҳамда доимо ҳушёр бўлишга чақирган», — дейилади муносабатда.