Associated Press Оқ уйга кириш рад этилгани юзасидан судга мурожаат қилди

Associated Press журналистларига Оқ уйга кириш ва АҚШ президенти самолётига чиқиш тақиқланди. Бу ҳаракатлар сўз эркинлигини бузади, дейилади агентлик даъвосида.

Фото: Getty images

Американинг Associated Press (AP) ахборот агентлиги АҚШ президенти Доналд Трампнинг уч нафар юқори мартабали ёрдамчисига қарши Оқ уйнинг журналистларнинг матбуот анжуманига киришини чеклаш қарори юзасидан судга мурожаат қилди. 21 феврал, жума куни Вашингтондаги АҚШ округ судига тақдим этилган даъво аризасида Овал кабинетга ва президентнинг Air Force One самолётига киришнинг рад этилиши сўз ва матбуот эркинлигини кафолатловчи АҚШ Конституциясига киритилган биринчи тузатишни бузиши айтилади.

Судда айбланувчилар Оқ уй аппарати раҳбари Сюзан Уайлс, унинг ўринбосари Тейлор Будович ва Оқ уй матбуот котиби Керолин Ливиттдир. Агентлик бу қадами билан «таҳририят мустақиллиги ҳуқуқини ҳимоя қилмоқчи» эканини тушунтирди. «Қўшма Штатлардаги матбуот ва барча одамлар ўз сўзларини танлаш ва ҳукумат таъқибига дучор бўлмаслик ҳуқуқига эга», деди AP.

Мэриленд штатидаги Консерватив сиёсий ҳаракатлар конференцияси (CPAC)да чиқиш пайтида даъво билан боғлиқ саволларга жавоб берар экан, Ливитт шундай деди: «Биз тўғри позицияни эгаллаганимизга ишонамиз. Биз ҳар куни Оқ уйда ҳақиқат ва аниқлик мавжудлигини таъминлашга содиқмиз».

AP журналистларига Овал кабинетга ва Трампнинг самолётига кириш тақиқланди

Ўтган ҳафта Associated Press ходимларига Оқ уйнинг Овал кабинети ва АҚШ президентининг Air Force One самолётига кириш тақиқланган эди. Оқ уй аппарати раҳбари ўринбосари Будовичнинг хабар беришича, бу қарор таҳририят Трампнинг тегишли фармонига қарамай, ўз нашрларида Мексика кўрфазининг номини Америка кўрфази деб ўзгартиришдан бош тортгани муносабати билан қабул қилинган. «Associated Press Америка кўрфазининг географик номидаги қонуний ўзгаришларни эътиборсиз қолдиришда давом этмоқда», — деб ёзган Будович X ижтимоий тармоғида агентликни «нотўғри маълумот тарқатишда» айблаб. Шу билан бирга, у AP журналистлари ва фотосуратчилари Оқ уй мажмуасига ташриф буюриш ҳуқуқини сақлаб қолишларига аниқлик киритди.

Аввалроқ, Google Maps хариталаш хизмати томонидан АҚШдаги фойдаланувчилар учун Мексика кўрфазининг географик номи Америка кўрфазига ўзгартирилган эди. АҚШ Геология хизмати ҳам кўрфаз номини ўзгартирди.

Трамп иккинчи президентлик муддатининг биринчи кунида номни ўзгартириш тўғрисидаги фармонни имзолади.

#Оқ уй #Associated Press