Шри-Ланкада “адвокат” суд залида гумонланувчини отиб ташлади

Шри-Ланка пойтахти Коломбодаги суд залида Ганемулла Санжива номи билан танилган жиноий гуруҳ етакчиси Санжив Кумара Самараратне отиб ташланди. Бу ҳақда BBC хабар берди.

Қотил ўзини адвокат сифатида танитиб, суд биносига кирган. Жиноят қуроли сифатида у тўппонча ишлатган. Қуролни 25 ёшли қиз текширувлардан олиб ўтган — уни саҳифалари кесиб олинган китоб ичига яширган.

Ҳужумчи қочишга уринди, аммо ушланди. Унинг шериги бўлган қиз эса ҳамон қидирувда. Полиция у ҳақдаги маълумот учун мукофот эълон қилди.

Яна нималар маълум?

Санжива бир нечта қотилликда гумонланиб, 2023 йил сентябрдан бери қамоқда сақланаётганди. Ўтган ҳафта у судга олиб келинган, сўнгра ҳужумга учрагач, шифохонага етказилган, у ерда Санжива вафот этди.

Воқеадан сўнг парламентда судларда хавфсизлик чораларини кучайтириш масаласи муҳокама қилинди. Ўта хавфли гумонланувчилар учун қуролли соқчилар ташкил этиш масаласи кўтарилди.

Ҳодиса расмийларнинг уюшган жиноятчиликка қарши курашни кучайтириш ҳақидаги ваъдалари фонида содир бўлди. 2024 йилда Шри-Ланкада камида тўққизта қотиллик жинояти қайд этилган.