Канада Познер ва Россия мудофаа вазири ўринбосарига қарши санкциялар киритди

Телебошловчи Владимир Познер, Россия энергетика вазири Сергей Цивилев ва унинг рафиқаси, мудофаа вазири ўринбосари Анна Цивилева, шунингдек, ўнлаб бошқа жисмоний ва юридик шахслар Россиянинг Украинага қарши уруши уч йиллиги муносабати билан Канададан янги санкциялар пакетига дучор бўлди. Умуман олганда, 24 феврал, душанба куни Канаданинг санкциялар рўйхатига 33 киши ва 44 компания, шунингдек, Россия «соядаги флоти»нинг 109 танкери қўшилди.

Бошқалар қаторида таниқли чанғичи ва Россия чанғи пойгалари федерацияси президенти Елена Вялбе, Ахмат Қодиров жамғармаси, "Артек", "Институт развития интернета", Россия Аэрокосмик кучлари ҳамда радиациявий, кимёвий ва биологик мудофаа қўшинларига чекловлар қўйилди.

Бундан ташқари, Хитой, Кипр ва Эрон компаниялари ҳам санкцияларга дучор бўлган. Улардан бири Iran Air.

Европа Иттифоқининг Россияга қарши санкциялари ўн олтинчи тўплами

Шу куннинг бошида Европа Иттифоқи Россияга қарши 16-санкция пакетини қабул қилди. У энергетика, савдо, транспорт, инфратузилма ва молиявий хизматлар каби Россия иқтисодиётининг асосий тармоқларига қаратилган кенг қамровли чора-тадбирларни ўз ичига олади, шунингдек, санкциялардан қочиш ва Россия дезинформациясига қарши курашни кучайтиради.

Мавжуд санкцияларни четлаб ўтишга қарши курашиш чора-тадбирлари доирасида рўйхатга яна 74 та кема қўшилди (ҳозирда уларнинг умумий сони 153 тага етган). Ушбу кемалар «соядаги флот»нинг бир қисмидир ёки Россиянинг энергия даромадларига ҳисса қўшган, дейилади пресс-релизда. Санкциялар рўйхатига киритишнинг янги мезони жорий этилди: хавфли нефт танкерларининг ишлашини қўллаб-қувватловчиларга нисбатан санкциялар қўлланди.

Бундан ташқари, Россия ҳарбий-саноат комплексини қўллаб-қувватловчи ёки санкцияларни четлаб ўтишда иштирок этувчи 53 та янги компания учун мақсадли экспорт чекловлари жорий этилди. Уларнинг 34 таси Россиядан ташқарида, хусусан Туркия ва Хитойда жойлашган.

Чекловлар, шунингдек, 48 нафар шахс ва Россия ҳарбий-саноат комплексини қўллаб-қувватловчи 35 ташкилотга ҳам таъсир кўрсатди. Улар санкциялардан қочиш, крипто-активлар ва юк ташиш саноатида ишлаш билан шуғулланган. Европа Иттифоқининг санкциялар рўйхати бир қатор йирик россиялик тадбиркорлар ва компаниялар раҳбарларини ўз ичига олган ҳолда кенгайтирилди.

24 феврал куни Буюк Британия ҳам Россияга қарши 2022 йилдан бери энг йирик санкциялар пакетини эълон қилди.