Мюнхен ва Ҳамбург аэропортлари ходимлари иш ташлаш эълон қилди

Касаба уюшмалари давлат хизматчиларининг маошлари оширилишини талаб қилмоқда. Иш ташлашлар сабаб Мюнхендаги рейсларнинг қарийб 80 фоизи бекор қилинган.

Фото: Frank Hoermann

Мюнхен ва Ҳамбург аэропортларида касаба уюшмаларининг ташаббуси билан 27 феврал куни икки кунлик иш ташлаш бошланди.

Қайд этилишича, унда асосан йўловчиларнинг рейсга чиқарилишида хизмат кўрсатадиган ишчилар — ахборот-техник, аэропортлар хавфсизлик хизмати, йўловчилар назорати ва юкларни тайёрлаш бўлимлари ходимлари қатнашмоқда.

Катталиги бўйича Германияда иккинчи ўринда турадиган Мюнхен аэропортида рейсларнинг қарийб 80 фоизи бекор қилинган. Ҳамбургда аэропорт раҳбарияти парвозлар режасини сақлаб қолишга муваффақ бўлган, аммо айрим рейслар кечикиши мумкинлиги айтилган. Ҳар иккала аэропорт ҳам йўловчиларга кечиктириладиган ёки бекор қилинадиган рейслар бўйича маълумотларни кузатиб боришни сўраб, мурожаат йўллаган.

Таъкидланишича, иш ташлашлар давлат хизматчиларининг маошларини ошириш мақсадида иш берувчиларга босим қилиш учун ташкил этилган. Авиакомпаниялар ушбу музокаралар иштирокчиси ҳисобланмаса-да, йўловчилар авиачипталарини бекор қилишлари ортидан улар ҳам зарар кўради.