“Элчи бўлмоқчиман” — наманганлик “инглиз” қиз

11 ёшли Нилуфар Шуҳратова инглиз тилини яхши ўзлаштирган. Ўзи тенгқур ёшларга ука ва сингилларига ҳам бу фанни волонтёр сифатида ўргатади. 100 дан ортиқ бадиий китобларни инглиз тилида мутолаа қилган. Ҳарвард университети талабаси бўлиш энг катта орзуларидан бири. Келажакда касблар ҳақида ўйлаётган Нилуфар ўзини баъзан дипломат, баъзан эса таржимон сифатида кўради.

“Деярли ҳар куним кутубхонада ўтади. Ҳозирда инглиз тилини катта қизиқиш билан ўрганяпман. Инглиз тилини ўрганишимда онамнинг ҳиссалари кўпроқ бўлган. Ота-онамнинг яратиб берган шароити туфайли ҳам бу тилни мароқ билан ўзлаштириб келяпман.

Уйда ҳам инглиз тилида суҳбатлашамиз. Мени кўриб синглимнинг ҳам тил ўрганишга бўлган иштиёқи анча ўсди. 5 ойлик укамни овутиш учун ҳам унга инглиз тилида гапираман.

Инглиз тили ўрганишни асосан 3-синфдан бошладим. Онамнинг топшириқларини бажарсам улар менга совға берарди. Ота-онам хоҳлаган китобимни олиб беради. Бу ҳолатлар эса тил ўрганишга бўлган қизиқишим янада ортишига сабаб бўлган. 100 дан ортиқ инглизча китоблар ўқиганман. Кўпроқ саёҳатга оид китоблар ўқишни яхши кўраман.

Яқинда IELTS олмоқчиман, апрел ойида миллий сертификат учун имтиҳон топширмоқчиман. Насиб қилса яхши натижаларни ўзимдан кутиб қоламан.

Келажакда Ҳарвардда ўқимоқчиман. Элчи бўлиш эса энг катта орзуларимдан бири.

Онам бола парвариши билан банд бўлгани учун кўчаларда ўзим мустақил юришимга тўғри келади. Ота-онам телефон ўйнашимга қаттиқ қаршилик қилиб келади ва биз бу ҳолатга аллақачон кўникдик”, — дейди Нилуфар Шуҳратова.

Сарвар Зиёев,
Kun.uz
Оператор ва монтажчи – Сардор Мамиров