Германияда «катта коалиция» тузиш бўйича музокаралар бошланди

Бундестагга навбатдан ташқари сайловлардан икки ярим ҳафта ўтгач, Берлинда Христиан-демократик иттифоқ (ХДИ) ва Христиан-социал иттифоқ (ХСИ) консерватив блоки ҳамда Германия Социал-демократик партияси (ГСДП) ўртасида ҳукмрон коалиция тузиш бўйича музокаралар бошланди. 13 март, пайшанба куни кечқурун Берлиндаги ХДИ қароргоҳида консерваторлар ва социал-демократларнинг музокара гуруҳлари учрашди.

Музокаралар 16 та ишчи гуруҳда бўлиб ўтади

Аввалроқ, бўлажак «катта» коалициянинг ҳар икки иштирокчиси музокараларда иштирок этадиган ўз делегациялари аъзолари номини маълум қилган эди. Улар ҳар бири 16 та иштирокчидан иборат 16 та турли ишчи гуруҳларда коалиция келишувини ишлаб чиқиши ва 24 мартгача коалиция келишуви бўйича ўз таклифларини тақдим этишлари керак. Миграция, бюджет, солиқ ва мудофаа каби масалалар юзасидан мураккаб музокаралар кутилмоқда.

Ишчи гуруҳларнинг муҳокамаси натижалари музокараларнинг якуний босқичида тақдим этилади, унда 19 киши, жумладан, уч партия етакчилари – Германиянинг навбатдаги канцлери, христиан-демократ Фридрих Мерц, социал-демократлар Ларс Клингбайл ва Саскиа Эскен, шунингдек, Бавария бош вазири ва ХСИ раҳбари Маркус Зёдер иштирок этади.

23 феврал куни Бундестагга бўлиб ўтган навбатдан ташқари сайловлардан сўнг, овоз беришда ғолиб бўлган мухолифатдаги ХДИ/ХСИ блоки ҳозирги ҳукмрон коалиция аъзоси ГСДП билан дастлабки маслаҳатлашувларни бошлади. Ушбу босқич 8 март куни якунланди ва натижада бир қатор йўналишлар бўйича муросага келиш, жумладан, миграция сиёсатини қатъийлаштириш, шунингдек, молия сиёсатидаги кенг кўламли ўзгаришларни назарда тутувчи асос ҳужжати лойиҳаси тақдим этилди.