Россия Суриянинг янги маъмуриятига илк бор нефт етказиб берди

Россия нефти юкланган «соядаги флот»нинг нефт танкери Сурияга етиб келди. 21 март, жума куни халқаро ОАВ хабарига кўра, бу Дамашқнинг янги ҳокимиятига нефт етказиб беришнинг биринчи ҳолатидир.

Россия Сурияга нефт ва дизел ёнилғиси етказиб берди

Суриянинг SANA ахборот агентлиги 21 мартга ўтар кечаси Баниясдаги денгиз терминалига «озод қилинганидан бери, яъни Башар Асад ағдарилганидан кейин биринчи нефт танкери» етиб келгани ҳақида хабар берди. Ўрта Ер денгизи соҳилидаги Банияс шаҳрида Суриядаги энг йирик нефтни қайта ишлаш заводи жойлашган. У ерда нефт маҳсулотлари билан ишлайдиган электр станцияси ҳам бор.

SANA ахборот агентлигининг хабар беришича, етиб келган танкер Aquatica деб номланган ва бортида 99 771 тонна нефт бўлган. Aquatica Greenpeace томонидан юритиладиган Россия Федерациясининг «соядаги флоти» кемалари рўйхатига киритилган.

Reuters хабарига кўра, Aquatica рус нефтини олиб борган. Агентликнинг ёзишича, Sakina номли яна бир танкер Баниясга 25 март куни етиб келиши керак. Унда 100 минг тоннага яқин рус нефти бор. Иккала кема ҳам феврал ойида Мурманскда юкланган. Иккаласи ҳам Байден маъмурияти томонидан январ ойида жорий этилган АҚШ санкциялари остида.

Март ойи бошида Reuters агентлиги Россия Суриянинг янги расмийларига илк бор дизел ёнилғиси етказиб бергани ҳақида ёзган эди. У билан бирга икки танкер — АҚШ санкциялари остида бўлган Prosperity ва Proxima ҳам Баниясга етиб келди. Бу 2013 йилдан бери Россиядан Сурияга дизел ёнилғисининг биринчи етказиб берилишидир.