Рубио: Путин билан тинчлик тўғрисида "чексиз музокаралар" бўлмайди

Президент Доналд Трамп «чексиз музокаралар тузоғига тушмайди», деди АҚШ давлат котиби Марко Рубио НАТО ташқи ишлар вазирларининг 4 апрел, жума куни Брюсселда бўлиб ўтган йиғилишидан сўнг. "Россия тинчликни истаётгани ёки аксинча ниятда эканини тез орада, ойлар эмас, балки ҳафталар ичида билиб оламиз", - деди у. Агар можаро тарафи тинчликдан манфаатдор бўлса, у ҳарбий ҳаракатларни тўхтатади ва оқилона талаблар қўяди, деб таъкидлади Рубио. «Бу ақлдан озган талаблар эмас, оқилона шартлар бўлиши керак», деб қўшимча қилди Давлат департаменти раҳбари.

Марко Рубио, шунингдек, агар рус қўшинлари Украинада янги ҳужум уюштирса, «шундан кейин улар тинчликни хоҳлайдими ёки йўқми, маълум бўлади», деди. «Агар бу бўлмаса, биз сиёсатимизни ўзгартиришимиз учун буни олдиндан билишимиз керак», деб тушунтирди у. Давлат котибининг сўзларига кўра, айнан Россия томони аввалроқ Украинада ўт очишни тўлиқ тўхтатишдан бош тортган. Унинг аниқлик киритишича, АҚШ Конгресси аллақачон Москвага қарши қўшимча санкциялар тўғрисидаги қонун лойиҳаси устида ишлай бошлаган ва Вашингтон томонидан босимни кучайтиришга ваъда берган.

Америка дипломатияси раҳбари, шунингдек, Қўшма Штатлар Россия-Украина урушида кенг қамровли ўт очишни тўхтатишга зудлик билан эришишни тўғрироқ деб билишини таъкидлади. Бироқ, унинг айтишича, Вашингтон Қора денгизда ўт очишни тўхтатиш ва энергетика объектларига зарбаларни бас қилиш ғояси устида ишлашга рози бўлган, чунки унинг фикрича, бу ҳам «олдинга силжиш ҳисобланади». «Ҳар икки томон ҳам бу сулҳ бузилаётганига ишониши аниқ, бу шундай чекланган оташкесимларга хосдир», деди давлат котиби.