АҚШ Зеленскийнинг НАТО саммитига таклиф этилишига қарши — ANSA

Июн ойида Ҳаагада НАТО саммити ўтказилади. АҚШ томони унга Украина президенти Володимир Зеленскийнинг ҳам таклиф қилинишига қарши чиқмоқда.

Фото: EPA

АҚШ Украина президенти Володимир Зеленскийнинг 24 июн куни Ҳаагада ўтказиладиган НАТО саммитига таклиф қилинишига қарши. Бу ҳақда Италиянинг ANSA агентлиги дипломатик манбаларига таяниб хабар берди.

«Деярли барча иттифоқчилар Вашингтоннинг бу қароридан ҳайратда эканини билдирди», — дейди нашр суҳбатдошларидан бири.

14 май куни ҳолатига кўра, саммитда иштирок этиш учун алянс таркибига кирмайдиган фақат тўртта давлат — Япония, Жанубий Корея, Австралия ва Янги Зеландия таклиф олган.

Агентликнинг қайд этишича, Украинанинг саммитда иштирок этиш масаласи ҳали ёпилмаган, ушбу мавзу Анталияда ўтказиладиган ташқи ишлар вазирлари учрашувида кўтарилиши мумкин.

Bloomberg маълумотларига кўра, НАТОнинг Ҳаагадаги саммити «олдинги учрашувлардан қисқароқ» бўлади ва унда Украина мавзусига эмас, балки ҳарбий харажатларнинг ошиши ва ҳарбий мақсадларга мўлжалланган ишлаб чиқаришни кучайтиришга эътибор қаратилади.