Британия Россияга қарши санкцияларни кучайтиришга чақирди

Буюк Британия мудофаа вазири Жон Хили фикрича, Россия президенти Владимир Путин Россияга қарши қўшимча санкциялар қўллаш орқали музокаралар столига ўтиришга мажбур бўлиши керак. «Биз ҳаракат қилишимиз керак, музокаралар олиб бориш учун Путинга босим ўтказишимиз керак», деди Хили 15 май, пайшанба куни Берлинда Германия мудофаа вазири Борис Писториус билан қўшма матбуот анжуманида.

«Бугун бутун дунёнинг нигоҳи Истанбулда», деди Хили Туркияда Россия ва Украина делегациялари ўртасида кутилаётган музокаралар билан боғлиқ ҳолда. «Путин тинчликни хоҳлашини айтди, лекин у ўт очишни тўхтатишдан бош тортди. Музокаралар олиб боришни хоҳлаётганини айтди, лекин у ўзи таклиф қилган конференцияга ҳам келмади», — деди Британия мудофаа вазири ва «Путин эртага урушни тугатиши мумкин» эканини қўшимча қилди.

Борис Писториус ҳам Украинадаги урушни тугатиш калити айнан Путинда, деган фикрни билдирди. «У Истанбулга бориб, музокаралар бошлаши мумкин эди, ўт очишни тўхтатишга буйруқ бериши мумкин эди, лекин буларнинг ҳеч бири амалга ошмаяпти», деди у.

«Сиз Путин худди цирк аренасидаги каби Америка президентини бурнидан тутиб етакламоқчи деб ўйлашингиз мумкин, аммо бу Доналд Трампга ёқмаса керак. Бу Америка маъмуриятининг Москвага нисбатан танлаган йўналишини ўзгартиришга олиб келиши мумкин», дея тахмин қилди Писториус.