Олотда пропан шохобчасида ёнғин рўй берди

“Камаз”га газ қуйиш вақтида чақнаш содир бўлиб, ёнғин келиб чиққан. Ёнғинни ўчиришга ҳаракат қилган бир неча фуқаро жароҳат олган.

Фото: Бухоро вилояти ФВБ

Бухоро вилояти Олот туманида пропан газ қуйиш шохобчасида ёнғин юз берди.

Вилоят ФВБга кўра, воқеа 23 май соат 21:15 ларда Жайхунобод МФЙда жойлашган “Сирож сервиз” МЧЖга қарашли шохобчада рўй берган.

“Камаз” автомобилига газ қуйиш вақтида чақнаш содир бўлиб, ёнғин келиб чиққан. Воқеа жойига 2 та ёнғин экипажи соат 21:19 да етиб борган, соат 21:40 да ёнғин батамом ўчирилган.

Қайд этилишича, ёнғинни ўчиришга ҳаракат қилган фуқароларнинг тан жароҳати олиш ҳолатлари қайд этилган. Ҳозирда улар шифокорлар назоратида, аҳволлари яхши.

“Ёнғин оқибатида ҳеч қандай портлаш содир бўлмаган”, дейилади бошқарма ахборотида.

Ёнғиндан автомобилнинг ён томонидаги газ қуйиш агрегатлари ва суюлтирилган углеводород гази қисман ёнган.

Ёнғин ёқилғи қуйиш вақтида технологик жараённинг бузилишидан келиб чиққан, деб тахмин қилинмоқда.

#пропан #Олот тумани