Фарғонада танишини қасддан босиб ўлдирган ҳайдовчига ҳукм ўқилди

Фарғона вилоятида танишини қасддан, қайта-қайта босиб ўлдирган ҳайдовчига суд ҳукми ўқилди. У 8 йил 6 ой муддатга озодликдан маҳрум этилди.

Қайд қилинишича, аввал 2 маротаба судланган қўқонлик фуқаро ўзганинг номида бўлган Onix автомобилида маҳалладошини босиб кетган.

Ҳодиса қачон ва қаерда юз бергани хабарда айтилмаган, унга ҳайдовчи ва дўкон эгаси ўртасидаги келишмовчилик сабаб бўлган.

Таъкидланишича, ҳайдовчи дўкон эгасини чақириб, сигнал берган. У кўчага чиққанида ўрталарида зиддият юзага келган. Шундан сўнг, ҳайдовчи дўкон эгаси ортидан кириб, уни бўғиб, тан жароҳати етказган. Икки дона сувни олиб, кетиб қолган.

Дўкон эгаси акаларига телефон қилиб, уларни чақирган. Ҳайдовчи ҳам қайтиб келган ва катта тезликда орқага ҳаракатланиб, дўкон эгасини босиб кетган. Машина остида жабрланувчи ётганини билса ҳам яна машинани олдинга ҳаракатлантириб, ғилдираклар билан фуқарони эзиб ташлаган.

Жабрланувчи орадан ўн кун ўтиб шифохонада вафот этган. Судланувчи суд ҳукми билан 8 йил 6 ой муддатга озодликдан маҳрум этилди.