Украина: жасадларни ватанга қайтариш шу ҳафта бошланади

Россия ва Украина ўртасида Истанбулда бўлиб ўтган музокаралардан сўнг репатриация тадбирларининг бошланиши шу ҳафта, 9—15 июн кунларига мўлжалланган. Бу ҳақда 8 июн, якшанба куни Украина ҳарбий асирлар билан ишлаш бўйича мувофиқлаштирувчи штаби Telegramʼда маълум қилди.

«Истанбулдаги музокаралар якунлари бўйича репатриация тадбирларини шу ҳафта бошлаш режалаштирилган, бу ҳақда ваколатли шахслар сешанба куни (3 июн) хабардор қилинган. Душманнинг ахборот ўйинига қарамай, ҳаммаси режа бўйича кетмоқда», — дейилади Мувофиқлаштириш штабининг Telegramʼдаги постида.

Истанбулдаги келишувларга кўра, Россиянинг олти минг ҳалок бўлган украиналик ҳарбийларнинг жасадини топшириши жараёни яқин кунларда бошланади. Бу ҳақда Россия ТИВ расмий вакили Мария Захарова брифингда маълум қилди.

«Россия томони Украина томонида ҳалок бўлган 6 минг аскарнинг жасадини Украинага топширади», — дея дипломатнинг сўзларидан иқтибос келтирган Россия давлат матбуоти. Расмий вакил бу Москва томонидан хайрихоҳлик ишораси эканини таъкидлади. Шунингдек, у топшириш яқин кунларда бошланишини таъкидлади.

Дипломат, шунингдек, Россиянинг марҳумларнинг жасадларини қидириш ва йиғиш мақсадида фронтнинг бир қанча ҳудудларида ўт очишни тўхтатиш таклифини эслатди.