Трампнинг туғилган кунида Вашингтонда ҳарбий парад бўлиб ўтади

АҚШ президенти Доналд Трамп ўзининг туғилган куни муносабати билан Вашингтонда ҳарбий парад ташкил этади, деб ёзмоқда The Washington Post.

2017 йилда ҳам Трамп Вашингтонда ҳарбий парад ўтказиш таклифини билдирган эди. Ўшанда армия генералларидан бири «диктаторлар шундай қилади», дея жавоб қайтарган. АҚШда шаҳар бўйлаб ҳарбий техникаларнинг байрамони юриши — камдан-кам кузатилади. Аммо жорий йилда парад 14 июн куни Вашингтонда ўтказилади.

Шу ҳафтадан танклар, пиёдаларнинг жанговар машиналари ва оғир артиллериялар ортилган поездлар Мэриленд штатига етиб келишни бошлаган. Шундан сўнг, улар автовозларда Вашингтонга йўл олади. Қайд этилишича, 1,5 соатлик парад учун пойтахт кўчаларнинг бир қисми тўрт кунга ёпилади. Умумий ҳисобда тадбирда 150 та техника, жумладан, 25 тага яқин M1 Abrams, 6600 аскар, вертолётлар ва 50 та самолёт иштирок этади.

Парад АҚШ армиясининг 250 йиллигига бағишланган бўлиб, у Доналд Трамп 79 ёшини нишонлайдиган санага тўғри келади. Трамп биринчи президентлик муддати даврида Парижга ташрифидан кейин парад ўтказиш истагини билдирганида, у кўплаб харажатлар туфайли рад этилганди. Bloombergʼнинг таъкидлашича, бундан ташқари, Америка жамияти Россия, КХДР, Хитой каби диктатор ва авторитар режимларга хос бундай парадларга ўрганмаган. АҚШда ҳарбий парад 1946 йили Ню-Йоркда, 1991 йили эса Вашингтонда ўтказилган. Биринчисига Иккинчи жаҳон урушидаги ғалаба, иккинчисига эса Ямандаги операция якунлангани сабаб бўлган.

Жорий йилги парад харажатлари 25-40 миллион долларга баҳоланмоқда (бунда шаҳар расмийларининг кўчаларни ёпиш, хавфсизликни таъминлаш ва ундан кейинги тозалаш учун кетадиган харажатлари инобатга олинмаган). Мудофаа вазирлигининг қуруқликдаги кучларига масъул бўлган Дениэл Дрисколлнинг фикрича, парад жанговар руҳни ва армияда шартнома бўйича хизмат қилиш истагида бўлганлар сонини оширишга кўмаклашади.

Шу билан бирга, президент маъмурияти Фахрийлар ишлари бўйича вазирликнинг 83 минг нафаргача ходимини ишдан бўшатишни режалаштирган.

Парад Трампнинг миграция сиёсатига қарши оммавий намойишлар ўтказаётган Лос-Анжелес аҳолисига қарши ҳарбий куч қўллаш тўғрисидаги қарори фонида бўлиб ўтади. Трамп Лос-Анжелесга Миллий гвардиянинг 2 минг аскарини, кейин эса 700 нафар денгиз пиёдаларини юборган.