Россияда «Госуслуги» аккаунтларини бузган ўзбекистонлик ушланди

У Россия фуқароларининг аккаунтларини бузиб, мигрантларни манзилда ноқонуний рўйхатдан ўтказгани таъкидланмоқда.

Фото: РБК

Россиянинг Стерлитамак шаҳрида маҳаллий фуқароларнинг «Госуслуги» аккаунтларини бузиб, ўндан ортиқ мигрантни рўйхатдан ўтказган Ўзбекистон фуқароси қўлга олинди. Бу ҳақда Baza хабар берди.

Манбага кўра, Азаматжон Р. исмли эркакка нисбатан хориж фуқароларини сохта рўйхатга олиш моддаси бўйича жиноий иш очилган. У уй қамоғига олинди.

Тергов фикрича, эркак рўйхатдан ўтишда ёрдам учун ҳамюртларидан пул олган. Бунинг учун у «Госуслуги» давлат хизматлари порталини бузиб кирган ва аккаунт эгасига билдирмасдан ватандошларини рўйхатдан ўтказган. Ҳаммаси бўлиб ўндан ортиқ чет элликни қонунийлаштиришга муваффақ бўлгани таъкидланмоқда.

Эркак мамлакатдан ташқарида бўлганида ҳуқуқ-тартибот идоралари ходимлари эътиборига тушган. Бироқ яқинда Бошқирдистонга қайтиб келганида ушланган ва Уфага олиб кетилган.