Россия элитаси ўз фарзандлари учун хитойлик энагалар ёллашни бошлади

Россиядаги бой оилаларда хитой тилида сўзлашувчи энагалар улуши француз тилида гапирувчиларнинг ўрнини эгаллаб, иккинчи ўринга чиқди. Бу ҳақда Россия элитасига энага хизматларини кўрсатувчи компания асосчиси Валентин Гоголга таяниб, The New York Times хабар берди.

Унинг сўзларига кўра, биринчи ўринда ҳануз инглиз тилида сўзлашувчи тарбиячилар туради, бироқ хитой тилини билувчиларга талаб жуда тез ўсмоқда — компания бу эҳтиёжни қондиришга улгурмаяпти. Гоголнинг сўзларига кўра, бундай энагаларнинг ойлиги 5000 долларга етади, бироқ «ёллаш жараёни анча мураккаб кечмоқда».

Россия президенти ҳам яқинда ушбу трендни тасдиқлаган эди. Путин илк бор набираси борлигини тилга олиб, у пекинлик тарбиячиси билан хитойча мулоқот қилишини қайд этди: «Мен яқинларим, қариндошларимдан баъзилари хитой тилини ўрганаётгани ҳақида гапирганимда, набирамни назарда тутган эдим — унинг тарбиячиси пекинлик бўлиб, у билан хитой тилида бемалол суҳбатлаша олади».

Путиннинг таъкидлашича, хитой тилига бўлган қизиқиш ошиб бораётганида ҳеч қандай ҳайратланарли нарса йўқ. Россия президентига кўра, бу иқтисодий фаоллик ошиши билан боғлиқ. Қачонлардир инглиз, немис ва француз тилини биладиган мутахассисларга ҳам эҳтиёж шундай пайдо бўлган.

Украинага қарши уруш бошланганидан бери Россия кўпроқ Хитой билан ҳамкорлик қилишга мажбур бўлмоқда. 2024 йилда Хитой билан товар айирбошлаш ҳажми 240 миллиард долларга етган. Урушгача Россиянинг саноат ускуналари бўйича асосий етказиб берувчиси бўлган Германия билан товар айирбошлаш ҳажми бўлса 1990 йиллар бошидаги даражагача тушиб кетган. Немис маҳсулотларининг Россияга экспорти деярли 72 фоизга камайган, Германиянинг Россиядан импорти эса қарийб 95 фоизга қисқарган.