Испания ва Францияда ўрмон ёнғинлари авж олди

Испания шимоли ва Франция жанубида кучли ўрмон ёнғинлари содир бўлди. Шу сабабли Франциянинг Марселидаги аэропорт 8 июл, сешанба куни ёпилди. Ёнғинни ўчириш учун 800 нафар ўт ўчирувчи ва самолётлар иштирокида ўтказилган кенг кўламли операция туфайли ёнғин назорат остига олинди, деди Франция ички ишлар вазири Брюно Ретайо.

Дастлабки маълумотларга кўра, Марселда қурбонлар бўлмаган, 110 киши енгил жароҳатланган, жумладан, 30 га яқин ўт ўчирувчи ва полициячи. Ёнғин 700 гектар майдонни қамраб олган ва 63 та турар жой биносига зарар етказган, улардан 10 таси бутунлай ёниб кетган. 400 киши эвакуация қилинди. Маълум қилинишича, ўт ўчирувчилар тун бўйи ёнғинни ўчирган.

Испаниянинг кўп қисми ўрмон ёнғинларига реакция билдириш учун шай ҳолатга келтирилди. Мамлакатда метеорологик кузатувлар бошланганидан бери энг иссиқ июн ойи қайд этилди. Вазият айниқса Каталония минтақасида жиддий, у эрда ўрмон ёнғинлари уч минг гектар майдондаги ўсимликларни йўқ қилди. Ёнғинни ўчиришга 300 дан ортиқ ўт ўчирувчи ва ҳарбийлар жалб қилинган, бироқ операцияга кучли шамол тўсқинлик қиляпти. Каталониянинг Таррагона муниципалитетида ёнғин хавфи туфайли расмийлар 18 минг кишини уйини тарк этмасликка чақирди.

Европа ўрмон ёнғинлари ахборот тизими (Effis) маълумотларига кўра, Испания 2022 йилда Европадаги ўрмон ёнғинларидан энг кўп зарар кўрган давлат бўлди. Ўша йили 500 та ёнғин 300 минг гектардан ортиқ майдондаги ўсимликларни ёқиб юборди. 2025 йилда Испанияда 21 минг гектарга яқин майдон йўқ қилинган.