АҚШ сенатори Грэм: Украинадаги уруш бурилиш нуқтасига яқинлашмоқда

«Яқин кунларда сиз Украинага рекорд даражадаги қурол етказиб берилишини кўрасиз ва Қўшма Штатлар президенти ўз ихтиёрида ҳеч қачон бўлмаган санкцияларга эга бўлади», деди нуфузли республикачи сенатор Линдси Грэм.

Фото: Украина президенти офиси

Россиянинг Украинадаги уруши бурилиш нуқтасига яқинлашмоқда: Россия президенти Владимир Путинни музокарага кўндирмоқчи бўлган АҚШ президенти Доналд Трамп ойлар давомида очиб қўйган эшик тез орада ёпилади. Бу ҳақда 13 июл, якшанба куни АҚШ Сенатининг Бюджет қўмитаси раиси, республикачи Линдси Грэм CBS News телеканалидаги Face the Nation with Margaret Brennan дастурида айтиб ўтди.

Грэм эслатишича, АҚШ Сенатининг 85 га яқин аъзоси Трампга нафақат Россия иқтисодиётига, балки «Путиннинг уруш машинасини қўллаб-қувватловчи» барча мамлакатларга зарба беришга ёрдам қиладиган санкциялар тўғрисидаги қонун лойиҳаси учун овоз беришга тайёр. Нуфузли сенаторнинг сўзларига кўра, ушбу санкциялар пакети АҚШ президенти Доналд Трампга «Россияга ёрдам берадиган ва Путиннинг уруш машинасини қўллаб-қувватловчи ҳар қандай давлатга 500 фоизлик божлар жорий этиш» имкониятини яратади.

«У (Доналд Трамп) тарифларни кўтариши ёки тушириши мумкин. У тарифларни 0 фоиздан 500 фоизгача белгилаши мумкин. У максимал мослашувчанликка эга. Лекин биз Путинни қўллаб-қувватловчи одамларнинг орқасидан борамиз ва Россиянинг ўзига қўшимча санкциялар киритамиз. Бу ҳақиқатан ҳам президент Трамп бу урушни тугатиш учун унинг ихтиёрида бўлган восита», — дея тушунтирди Линдси Грэм.

«Яқин кунларда сиз Украинага ўзини ҳимоя қилишга ёрдам берадиган мисли кўрилмаган даражада қурол етказиб берилишини кўрасиз, деб умид қиламан. Келгуси кунларда президент Трамп ихтиёрида илгари ҳеч қачон бўлмаган тарифлар ва санкциялар бўлади. Яқин кунларда Украинага ёрдам бериш бўйича саъй-ҳаракатлар бўйича Европадан кўпроқ қўллаб-қувватлаш кутаман», — дея таъкидлади у ўша интервюсида.