Сурия Туркиядан мудофаа салоҳиятини мустаҳкамлашда ёрдам сўради

Туркия Суриянинг мудофаа салоҳиятини ошириш учун ишлар давом эттирилишини маълум қилди.

Фото: AP

Сурия ҳукумати Туркияга мурожаат қилиб, мамлакат мудофаа салоҳиятини мустаҳкамлаш ва террорчи ташкилотларга қарши курашда ёрдам кўрсатишни расман сўради. Бу ҳақда Туркия Миллий мудофаа вазирлигидаги манбаларга таяниб Anadolu хабар берди.

«Ушбу талабга мувофиқ, биз Суриянинг мудофаа салоҳиятини ошириш учун ўқитиш, маслаҳат бериш ва техник ёрдам кўрсатиш бўйича ишларни давом эттирмоқдамиз», деб таъкидлади вазирлик вакиллари.

Манбаларнинг таъкидлашича, Туркия Суриянинг ҳудудий яхлитлигини ҳимоя қилиш, барқарорликни сақлаш ва террорчилик ташкилотларига қарши курашиш масалаларида қатъий позицияни сақлаб қолади.

«Миллий мудофаа вазирлиги Суриянинг янги ҳукумати билан яқиндан ҳамкорлик қилмоқда. Туркиянинг асосий мақсади Суриянинг сиёсий бирлиги ва ҳудудий яхлитлигини қўллаб-қувватлаш, шунингдек, минтақада мустаҳкам тинчликка эришиш бўйича саъй-ҳаракатларга раҳбарлик қилишдир», дейилади хабарда.