Испания пляжлари Осиё сувўтлари билан қопланди

Испаниянинг Кадис шаҳри пляжлари одатда Осиёда ўсадиган Rugulopterix okamurae сувўтлари билан қопланди, деб хабар берди Euronews.

Май ойидан буён биргина Ла Калета пляжидан 1200 тонна сувўтлар йиғиштириб олинган.  

“Бу экологик фалокат”, - деди  Кадис шаҳар кенгашининг пляжлар бўлими бошлиғи Хосе Карлос Теруэл. 

Қайд этилишича, охирги ўн йил ичида Сувайш канали орқали ўтган кемалар билан келиб қолган Осиё сувўтлари Гибралтар бўғози соҳилларини эгаллаб олган.  

Rugulopterix okamurae — денгиз сувўтларининг бир тури бўлиб, асосан Япония, Хитой, Корея, Тайван ва Филиппин соҳилларида ўсади. Охирги йилларда бу сувўтлар Ўртаер денгизи ва Атлантика океанида шиддат билан тарқалмоқда. Улар маҳаллий ўсимликларни сиқиб чиқариб, денгиз тубини гилам сингари қопламоқда. Бу эса экотизимнинг ўзгариши ва биохилма-хилликнинг пасайишига ҳамда балиқчилик ва туризмда қийинчиликлар пайдо бўлишига олиб келмоқда.