Вучич режиссёр Кустурицани давлат тўнтаришига уринишда айблади

Сербия президенти Александр Вучичнинг айтишича, унинг ватандоши, режиссёр ва мусиқачи Эмир Кустурица Сербия мухолифати вакиллари билан биргаликда уни давлат раҳбари лавозимидан ағдаришга уринмоқда. «Бу бемаънилик нимага олиб келганига қаранг — уларнинг барчаси биргаликда: Динко Грухонич (Нови Сад университети ўқитувчиси), Кустурица, Чанак (мухолиф сиёсатчи Ненад Чанак) ва Ломпар (Белград университети ўқитувчиси Мило Ломпар). Уларнинг мақсадли фарқи йўқ, бунда умумий нишон бор - Вучич, уни ағдариш керак ва бу уларнинг дастури, бошқа дастур йўқ», — дея Сербия президентидан иқтибос келтиради Россиянинг «РИА Новости» агентлиги.

Унинг сўзларига кўра, барча сиёсий рақиблари ҳеч қандай дастурга эга эмас ва Сербияга нима кераклигини ва унинг халқи нимани хоҳлашини тушунмайди, деб ёзади агентлик.

Қайд этилишича, Эмир Кустурица аввал ҳам Сербиядаги оммавий норозилик намойишларида қатнашган ва ҳозирда мамлакат конституциясини бузганликда айбланаётган «Белград ва Ужицадаги сиёсий маҳбуслар»нинг озод этилишини қўллаб-қувватлаган. Бундан ташқари, режиссёр 23 июл куни солиқ хизмати томонидан ўзининг "Дрвенград" сайёҳлик мажмуасида жойлашган "Висконти" ресторанини ёпиб қўйгани учун Вучич ва бош вазирнинг биринчи ўринбосари Синиша Мали бошчилигидаги расмийларга киноя билан «миннатдорчилик» билдирди.

Режиссёр Эмир Кустурица Россиянинг Украинага қарши тажовузкор урушини очиқ қўллаб-қувватлади, у бошланганидан сўнг Кремл тарғиботи форматида бир қанча асарларни нашр этди ва 70 ёшга тўлиши муносабати билан шахсан Россия президенти Владимир Путиндан табрик олди.