Россияда Speedtest интернет тезлигини текшириш сервиси блокланди

Россияда интернетга уланиш тезлиги ва сифатини ўлчайдиган Американинг Ookla компаниясининг Speedtest хизматига кириш блокланди, деб хабар берди Россия ОАВ. Роскомнадзор (РКН) блокировкани «жамоат алоқа тармоғи ва интернетнинг Россия сегменти хавфсизлигига таҳдидлари аниқлангани» билан изоҳлади. РКН «ишончли Россия сервисларидан фойдаланиш» тавсия этилганини қўшимча қилди ва "ПроСеть" хизмати — «маълумотларни узатиш тезлигини текшириш учун маҳаллий ечим» ҳақида эслатди.

Роскомнадзор 2024 йил июн ойида ўз мутахассислари мобил қурилмаларда алоқа сифатини текшириш учун "ПроСеть" деб номланган иловани яратганини маълум қилди.

Россияда Speedtest блокланиши мумкинлиги ўтган йилнинг октябр ойида маълум бўлган эди. Ўшанда Роскомнадзор «хизмат фаолияти Россия Федерацияси ҳудудида Интернет ва умумий алоқа тармоғи фаолияти барқарорлиги, хавфсизлиги ва яхлитлигига таҳдид солаётгани аниқланса, бу содир бўлишини» билдирди.

2023 йил октябр ойида Москва суди Ookla компаниясини Россияда маълумотларни маҳаллийлаштиришни қайта рад этгани учун 6 миллион рубл жаримага тортди.