Украиналик қочқинларга уруш тугагунига қадар АҚШда қолишга рухсат берилади

АҚШ президенти Доналд Трамп украиналик қочқинларга Россиянинг Украинага қарши бошлаган уруши тугагунига қадар АҚШда қолишга рухсат беришини айтди. «Биз буни қиламиз. Бизга Украинадан кўплаб одамлар келди ва биз улар билан ишлаяпмиз», деди Трамп Вашингтонда DW мухбирининг саволига жавоб берар экан.

2022 йил февралида Россиянинг Украинага қарши уруши бошланганидан сўнг, Қўшма Штатлар Uniting for Ukraine (U4U)дастури доирасида украиналикларга бошпана беришни бошлади. Дастур АҚШда ҳомийлари бор украиналикларга мамлакатга кириш имконини беради. Июн ойида Американинг Forbes журнали ушбу дастур доирасида 236 000 дан ортиқ ҳомийлик аризалари маъқуллангани ва 187 000 дан ортиқ украиналиклар Қўшма Штатларга келганини хабар қилди.

Март ойида, Трампнинг иккинчи президентлик муддати бошида Reuters агентлиги, манбаларга кўра, АҚШ ҳукумати 2022 йилдан кейин мамлакатга келган 240 мингга яқин украиналик қочқинни қонуний мақомидан маҳрум қилишни режалаштираётгани ҳақида хабар берган эди. Оқ уй Reuters маълумотини фейк деб атади.

Апрел ойида Украинадан келган қочқинлар АҚШ Ички хавфсизлик вазирлигидан мамлакатни тарк этиш сўралган электрон хат олди. Кейинроқ идора хат нотўғри юборилганини маълум қилди.