Рубио: Россия Украинадаги сулҳни ҳудудий мавзу билан боғлаяпти

Уиткофф ва Путиннинг Москвадаги учрашувидан сўнг, Қўшма Штатлар Россия Украинадаги урушни қандай шароитларда тугатишга тайёрлигини яхшироқ тушунди, деди АҚШ Давлат департаменти раҳбари.

Фото: Mandel Ngan / Reuters

Москванинг позицияси шундан иборатки, Украинада ўт очишни тўхтатиш бўйича ҳар қандай келишувнинг асосий элементлари ҳудудий мавзуни ўз ичига олган масалалар бўлади. Бу ҳақда 7 август, пайшанбага ўтар кечаси, Россия президенти Владимир Путин ва АҚШ президентининг махсус элчиси Стив Уиткоффнинг Москвадаги учрашувидан кўп ўтмай, АҚШ давлат котиби Марко Рубио маълум қилди. Унинг сўзларига кўра, ушбу учрашувдан сўнг Вашингтон Россия Украинада ўт очишни тўхтатишга қандай шароитларда тайёр бўлишини «яхшироқ тушуниб етди». «Бизда урушни тугатиш учун Россия талаб қиладиган нарсалар ҳақида биринчи марта аниқ мисоллар пайдо бўлди», деди Рубио Fox Business телеканалидаги Kudlow дастурида.

Путин ва Уиткофф ўртасидаги учрашувдан сўнг, AP ва dpa агентликлари АҚШ ва Германия ҳукуматларидаги аноним манбаларга таяниб Доналд Трамп Украинадаги урушни тугатиш масаласини муҳокама қилиш учун Владимир Путин билан учрашмоқчи эканлиги ва бу учрашув 11 август куни бошланадиган ҳафтанинг бошида бўлиб ўтиши мумкинлиги ҳақида олган маълумотларини эълон қилди.

Марко Рубио ушбу хабарларга изоҳ берар экан, Трамп ва Путин учрашуви айнан шу санада бўлиб ўтиши ёки бўлмаслигини билмаслигига ишора қилди. Ҳаммаси томонлар қандай ўзгаришга эришганига боғлиқ, дея тушунтирди у. Бундан ташқари, бундай учрашув хавфсизлигини таъминлаш учун «кўп иш қилиш керак», дея қўшимча қилди АҚШ давлат котиби.

Трамп ва Путин ўртасидаги телефон суҳбати ҳозирча Америка давлати раҳбарининг режасида йўқ, дея аниқлик киритди Рубио.