“Ўзбеккосмос” қурилиш майдонлари устидан доимий кузатув олиб боради

"Бино ва иншоотларнинг зилзилабардошлиги ва сейсмик хавфсизлигини назорат қилишда давлат назорати ва бошқарувини янада такомиллаштириш чора-тадбирлари тўғрисида"ги президент фармони лойиҳаси эълон қилинди.

Фото: Президент матбуот хизмати

Шундай тартиб ўрнатиладики, унга кўра, 2025 йил 1 октябрдан бошлаб “Ўзбеккосмос” агентлиги томонидан ҳудудларда амалга оширилаётган қурилиш майдонлари устидан доимий кузатув олиб борилади.

Бунда:

“Ўзбеккосмос” агентлиги ҳамда Қурилиш ва уй-жой коммунал хўжалиги соҳасида назорат инспекцияси маълумотлар базалари ўзаро интеграция қилинади;
“Ўзбеккосмос” агентлиги томонидан ҳудудий инспекциялардан рўйхатдан ўтган объектлар бўйича маълумотлар тизим орқали автоматик олинади;
“Ўзбеккосмос” агентлиги томонидан ҳудудий инспекциялардан рўйхатдан ўтмаган қурилиш майдонлари аниқланган тақдирда, мазкур объектлар ҳақида Қурилиш ва уй-жой коммунал хўжалиги вазирлиги ҳамда Кадастр агентлигига тегишли маълумотлар узатиб борилади.

Белгиланишича, “Ўзбеккосмос” агентлиги томонидан амалга ошириладиган кузатув ишлари республика бюджети ҳисобидан молиялаштирилади.