Аляскада Трамп ва Путин учрашуви учун катта уй тайёрланмоқда

АҚШ президенти Доналд Трамп ва Россия етакчиси Владимир Путиннинг учрашуви 15 август куни Аляскада бўлиб ўтиши керак.

The New York Times нашрининг ёзишича, Оқ уй ҳозирча учрашув ўтказиладиган аниқ жойни тасдиқламаган, бироқ тадбир Алясканинг энг йирик шаҳри - Анкорижда бўлиб ўтишига айрим белгилар бор.

Нашрнинг ёзишича, Анкорижда қисқа муддатли ижара билан шуғулланувчи риэлтор, шунингдек, Германиянинг фахрий консули Ларри Дисброу Махфий хизмат ходимлари учун олти хонали уйни ижарага олганини маълум қилган.

«Бугун эрталаб АҚШ махфий хизматидан менга қўнғироқ қилишди ва бўш ўринлар бор-йўқлигини сўрашди ва мен улар истаган вақтга рози бўлдим», деди Дисброу.

У, шунингдек, Аляска тарихий нуқтаи назардан бундай учрашув учун жозибадор жой бўлиши мумкинлигини тушунишини, аммо «ўзини ҳайратда қолдирганини» қўшимча қилди.

Шу билан бирга, Анкориж мэри Сюзанна ЛаФранс шаҳар маъмурияти Трамп ва Путин учрашувини қабул қилиши ҳақида ҳеч қандай маълумот олмаганини айтди.

«Биз учун Аляскада етакчиларни қабул қилиш одатий ҳол», деди ЛаФранс. «Дипломатия жойи бўлиб хизмат қилиш тарихимизнинг бир қисмидир, чунки биз дунё чорраҳасида турибмиз».

Нашр эслатишича, Трамп 2017 йилда ўз лавозимига киришганидан бери Аляскага камида беш марта ташриф буюрган ва асосан Анкориждаги Элмендорф-Ричардсон бирлашган ҳарбий базасида тўхтаган. Путин билан учрашув Трампнинг иккинчи муддати бошланганидан буён ушбу штатга илк расмий ташрифи бўлади.

Экспертларнинг фикрича, саммит ўтказиладиган жой стратегик аҳамиятга эгалиги ва Россия чегараларига яқинлиги сабабли танланган. Аляска, шунингдек, Халқаро жиноий суд юрисдикциясига кирмайдиган АҚШ ҳудуди бўлиб, бу Путиннинг ҳибсга олиниш хавфини четлаб ўтишга имкон беради.