Қўшимча функционаллар
-
Тунги кўриниш
«Совуқликдан йироқ» - Трамп ва Путиннинг учрашувдаги «тана ҳаракатлари» баҳоланди
Журналистлар икки етакчининг учрашуви «анча илиқ» ўтганини таъкидламоқда.
Фото: REUTERS
Американинг CNN телеканали АҚШ ва Россия президентлари Доналд Трамп ва Владимир Путиннинг Анкориж саммитидаги учрашувида «тана ҳаракатларига» эътибор қаратди.
Телеканалнинг маълум қилишича, икки етакчининг тана тили «совуқликдан йироқ» бўлган. Путин Трампга қизил йўлакдан яқинлашаётганида АҚШ президенти бир-икки марта қарсак чалиб, уни кутиб олди. Президентлар бир-бирининг қўлини икки марта сиққан ва биргаликда Трампнинг лимузини томон йўл олган. Расмий суҳбат бошланишидан олдин Путин ва Трамп табассум билан бир неча луқма ташлаган.
Кейинроқ, делегациялар учрашуви пайтида ўтирганларида, Трамп ҳам, Путин ҳам бир неча бор жилмайиб қўйган, гарчи Трампнинг юзи асосан «тошдек қотган» бўлса ҳам.
Россия президенти содир бўлаётган воқеаларга ўз муносабатини поза (танасининг ҳолати) орқали билдириши билан машҳур, деб таъкидлади телеканал. АҚШ собиқ президентлари унинг нутқ сўзлаётганда букчайиб туриш одатини қайд этган, бу эса унинг бўлаётган воқеаларга қизиқмаслиги белгиси эди. Аляскада у букчайиб ўтирмади. Аксинча, учрашув пайтида олдинга бироз эгилиб, қўлларини қовуштириб, камераларнинг шиқирлаши ва мухбирларнинг жавобсиз қолган саволлари остида ўтирди.
Шу билан бирга, NBC телеканали февраль ойида Трамп Украина раҳбари Володимир Зеленскийни қандай кутиб олгани билан ҳозирги ҳолатни таққослаб кўрди ва сезиларли фарқлар борлигини аниқлади.
Телеканалнинг қайд этишича, Путинни кутиб олиш Зеленскийга нисбатан анча «илиқ» бўлди. Эслатиб ўтамиз, февраль ойидаги можарода Трамп ва Зеленский тортишиб қолган, вице-президент Жеймс Вэнс Украина президентини «етарлича ҳурмат кўрсатмагани» учун танқид қилган эди.
Трамп ва Путин 15 август куни Аляскада учрашди, якунда ҳеч қандай келишув бўлмади. АҚШ ва Россия президентлари Анкориждаги ҳарбий базада музокара олиб борди. Музокаралардан сўнг, Путин ва Трамп матбуот вакиллари олдига чиқиб, ўз баёнотларини ўқиб эшиттирди. Шундан сўнг президентлар журналистларнинг саволларига жавоб бермасдан зални тарк этди.
