Зеленский 18 август куни Вашингтонда Трамп билан учрашади

Украина раҳбари бу ҳақда АҚШ президенти билан бўлган телефон суҳбатида келишиб олганини айтди.

Фото: AP

Украина президенти Владимир Зеленский Оқ уйда АҚШ президенти Доналд Трамп билан учрашади. Бу ҳақда Зеленский ўзларининг телефон суҳбати якунлари бўйича маълум қилди.

Зеленскийнинг айтишича, учрашув 18 август куни бўлиб ўтади. Уларнинг Трамп билан суҳбати «узоқ ва мазмунли бўлган». АҚШ президенти унга Россия президенти Владимир Путин билан учрашув якунлари ҳақида маълумот берган. Суҳбатнинг якуний қисмида Европа етакчилари ҳам мулоқотга қўшилган.

Зеленский, шунингдек, Украина, АҚШ ва Россия раҳбарлари ўртасида уч томонлама учрашув ўтказилишини қўллаб-қувватлашини таъкидлади.

Трамп Путин билан музокаралардан сўнг, Fox News телеканалига берган интервьюсида томонлар «келишувга анча яқин» эканини айтди. Унинг сўзларига кўра, энди Украина бунга рози бўлиши керак ва ҳаммаси «президент Зеленскийга боғлиқ». Трамп эҳтимолий келишув шартларига аниқлик киритмади, фақат у «ҳудудлар алмашинуви» ва Украинага хавфсизлик кафолатларини назарда тутишини таъкидлади.