Лавров Путин Зеленский билан қандай шартларда учрашишга тайёрлигини айтди

Россия президенти Владимир Путин Украина президенти Володимир Зеленский билан учрашишга барча масалалар пухта ишлаб чиқилганидан кейин тайёр бўлади, деди мамлакат ташқи ишлар вазири Сергей Лавров.

«Президент олий даражада кўриб чиқиладиган барча масалалар пухта ишлаб чиқилганидан кейин Зеленский билан учрашишга тайёрлигини бир неча бор таъкидлаган», — деди у.

Россия ташқи ишлар вазирининг сўзларига кўра, Москва, шунингдек, иш шартномалар тузишга қадар етиб борган тақдирда Украина томонидан келишувни ким имзолаши бўйича легитимлик масаласи ҳам ҳал қилиниши кераклигини билиши лозим.

Лавров Зеленскийнинг Путин билан музокара ўтказишни тақиқлаш тўғрисидаги фармонини эслаб ўтди.

2022 йил кузида Зеленский Россия президенти билан музокара ўтказишни тақиқлаш тўғрисида фармон чиқарганди. Аммо ўтган йили Украина етакчиси Россия президенти билан музокара ўтказиши мумкинлигини истисно қилмаган.