Шрёдер «Шимолий оқим-2» бўйича очиқ гувоҳлик беришга тайёрланмоқда

17 октябр куни Германиянинг собиқ канцлери «Шимолий оқим-2» қурилишини тергов қилаётган Мекленбург-Олд Померания ландтаги комиссиясига видео-алоқа орқали очиқ гувоҳлик беради. Бу ҳақда Герҳард Шрёдернинг адвокати хабар берди.

Герҳард Шрёдер Фото: Kay Nietfeld/dpa/picture alliance

Германиянинг собиқ канцлери Герҳард Шрёдер 17 октябр куни «Шимолий оқим-2» газ қувури қурилиши ҳолатларини ўрганаётган Мекленбург-Олд Померания федерал ери ландтаги (парламенти) комиссиясига кўрсатма бериши мумкин. Бу ҳақда 3 сентябр, чоршанба куни Шрёдернинг адвокатига таяниб, dpa агентлиги хабар берди.

Шрёдер Шверинда йиғилаётган комиссияга Ҳанновердаги офисидан видео-алоқа орқали гувоҳлик бериши кутилмоқда. Собиқ канцлернинг адвокати залда бўлган матбуот ва ташриф буюрувчилар кўрсатмани видеога олмаслиги шартини қўйди. Адвокат, шунингдек, процедурани эрталабки соатларга белгилашни сўради, чунки унинг 81 ёшли мижози «тушдан кейин эрталабки каби концентрация билан гувоҳлик бера олмайди».

«Жаноб Шрёдернинг очиқ сўроқ қилиниши яхши, айниқса у социал-демократик «Шимолий оқим 2/Иқлимни ҳимоя қилиш жамғармаси» бўйича операцияни ёритишда жуда муҳим гувоҳ бўлганлиги сабабли», — деди ландтаг комиссияси раҳбари Себастян Элерс. У тергов ташаббускорларидан бири бўлган Христиан-демократик иттифоқ вакили.

Тайёрлаган: Отабек Матназаров

#Германия #Герҳард Шрёдер