Гўзалликнинг ихчам формуласи: минималистик косметичка

Ҳозирги пайтда косметика саноати миллионлаб маҳсулотларни таклиф қилмоқда. Аёллар турли ранглар, текстуралар ва янги формулалар ичида адашиб қолиши табиий ҳол. Бироқ сўнгги йилларда дунё бўйлаб минимализм фалсафаси кучайиб, косметика соҳасида ҳам ўз аксини топмоқда. Минималистик косметичка — бу кераксиз ортиқча воситалардан воз кечиб, фақат энг зарур ва самарали маҳсулотларни ишлатиш ҳисобланади. Мутахассислар таъкидлашича, бу нафақат тери саломатлигини сақлайди, балки вақт ва маблағни ҳам тежайди.

Минималистик косметичкада бўлиши керак бўлган воситалар:

1.Тозаловчи восита

Ҳар қандай парваришнинг биринчи босқичи терини тозалашдир. Дерматологлар тавсия этганидек, енгил гель ёки кўпик терини чанг, ёғ ва косметикадан халос қилади. Ҳаддан ташқари кўп турдаги тозаловчи воситаларни ишлатиш терини қуритиб юборади.

2.Намлантирувчи крем

Тери мувозанатини сақлаш учун энг муҳим маҳсулот — намлантирувчи крем. У терининг табиий ҳимоя қатламини мустаҳкамлайди, қуриб кетиш ва эрта ажин тушишининг олдини олади. Минималистик ёндашувда универсал крем танланади, у кундуз ва тун учун ҳам мос бўлиши муҳим.

3.Қуёшдан ҳимоя креми (SPF)

Дерматологлар таъкидлашича, энг самарали қаришга қарши восита бу — SPF. Қуёшдан ҳимоя креми терини ультрабинафша нурларидан ҳимоя қилиб, доғ ва ажин пайдо бўлишини секинлаштиради. Минималистик косметичкада бу маҳсулот мутлақ зарур ҳисобланади.

4.Асосий декоратив воситалар

Минималистик косметикада одатда битта ёки иккита декоратив восита етарли бўлади. Масалан, BB-крем ёки енгил тонал крем, шунингдек лаб учун бальзам ёки нейтрал рангли помада. Бу маҳсулотлар бир вақтнинг ўзида ҳам парвариш, ҳам енгил пардоз вазифасини бажаради.

5.Кўп функцияли маҳсулотлар

Минимализмнинг асосий тамойилларидан бири — бир маҳсулотни бир нечта мақсадда ишлатиш. Масалан, крем-румянанинг лаб ва ёноққа мос келиши ёки универсал мойнинг ҳам тери, ҳам сочга қўлланиши. Бу ёндашув косметичкани ихчам қилади ва сарф-харажатни камайтиради.