Хитой делегацияси 7 йилда биринчи марта Европарламентга ташриф буюради

Брюсселда шу йилнинг кузида бўлиб ўтиши мумкин бўлган учрашувларда Украинадаги тинчлик ва Хитойнинг Европа Иттифоқи билан савдоси муҳокама қилинади, деди Politico нашрига Европарламент депутати Энгин Эрўғли.

Фото: AP

Хитой сиёсатчиларидан иборат делегация евродепутатлар билан учрашиш учун етти йилдан ортиқ «музлатилган муносабатлар»дан кейин илк бор Европарламентга ташриф буюради. Бу ҳақда Европа Иттифоқи-Хитой парламентлараро делегацияси раҳбари, Европарламентнинг юқори мартабали депутати Энгин Эрўғли баёнотига таяниб, Politico нашри хабар берди. Брюсселдаги учрашув бўйича ҳали ҳам музокаралар олиб борилмоқда ва у 2025 йил октябр ўрталарида ёки ноябр ойи бошида бўлиб ўтиши мумкин, Хитойга жавоб ташрифи эса 2026 йилнинг май ойида амалга оширилиши мумкин, деди у.

Эрўғлининг сўзларига кўра, ҳар икки учрашувда Европарламент депутатлари ва Бутунхитой халқ вакиллари кенгаши аъзолари Россиянинг Украинадаги уруши, Европа Иттифоқи ва Хитой ўртасидаги савдо масалалари, шунингдек, инсон ҳуқуқлари ва БМТнинг глобал дунё тартибидаги ролини сақлаб қолишнинг долзарб масалаларини муҳокама қилади.

Европарламент депутатининг қўшимча қилишича, «ЕИ Европа Иттифоқи ва Хитой ўртасидаги муносабатларни яхшилаш Хитойнинг уруш бўйича позициясига боғлиқлигини изчил таъкидлаши керак», аммо Пекиндан Украинадаги уруш бўйича ўз позициясини ўзгартиришини кутиш «реал эмас».