Қўшимча функционаллар
-
Тунги кўриниш
Axios: Трамп Путинга таъсир ўтказиш қобилиятига шубҳа билан қарай бошлади
АҚШ президенти Украинадаги урушни тезда тугатишга ваъда берди, бироқ энди у Путиннинг тинчликка тайёрлигини ортиқча баҳолаганини тан олди. Унинг маъмурияти энди босимни Европа гарданига юкламоқчи.
АҚШ президенти Доналд Трамп Россия президенти Владимир Путинга таъсир ўтказиш ва Россия томонидан Украинага қарши бошланган урушни тугатишга эришиш қобилиятига шубҳа билдира бошлади. Бу ҳақда 13 сентябр куни Axios портали тўғридан тўғри маълумотга эга бўлган манбага таяниб хабар берди.
Нашрнинг ёзишича, Трамп ўз атрофидагиларга Путиннинг тинчликка интилишини нотўғри баҳолаганини тан олган. Бир ой муқаддам Америка раҳбари Владимир Путин Украинада ўт очишни тўхтатишга рози бўлмаса ёки тинч йўл билан келишувга қадам қўймаса, бу жиддий оқибатларга олиб келишини айтган эди.
Бироқ Путин на ўт очишни тўхтатишга, на Украина президенти Володимир Зеленский билан учрашишга рози бўлмади. Шунга қарамай, Трамп Россияга қарши янги санкциялар киритмади.
Бунинг ўрнига АҚШ маъмурияти Европа Иттифоқидан Москва ва Пекинга босимни кучайтиришни талаб қила бошлади. Вашингтон қўшимча санкцияларни айнан ЕИ жорий этишини кутмоқда.
