Туркияда мухолифат намойишларига ўн минглаб одамлар келди

14 сентябр, якшанба куни Анқарада Туркиянинг энг йирик мухолифат кучи – Республика халқ партияси (РХП)нинг ўн минглаб тарафдорлари кўчаларга чиқди. Reuters хабарига кўра, намойишчилар Туркия президенти Ражаб Тоййиб Эрдўғаннинг истеъфосини талаб қилиб шиорлар билан чиққан.

Норозилик 2023 йил ноябрида Ўзғур Ўзел партия етакчилигига сайланган қурултой натижаларини бекор қилиш масаласини кўриб чиқиш учун 15 сентябр куни бўлиб ўтадиган суд мажлиси олдидан ташкиллаштирилди. Агар суд РХП қурултойи натижаларини ҳақиқий эмас деб топса, Ўзел ўз лавозимидан четлатилиши мумкин, бу эса Туркияда 2028 йилги президентлик сайловлари вақтига таъсир қилиши ва мамлакатнинг асосий мухолифат партиясида силкинишга олиб келиши мумкин, дея қайд этади Reuters.

«Бу сиёсий масала. Айбловлар туҳмат. Ўртоқларимиз бегуноҳ. Бўлаётган нарса бўлажак президентга, бўлажак ҳукуматга қарши қаратилган тўнтариш. Биз қаршилик қиламиз», — деди Ўзел митингда сўзга чиқиб.