Трамп Венесуэла кемасига берилган янги зарба ҳақида маълум қилди

Доналд Трампнинг маълум қилишича, зарба оқибатида уч киши ҳалок бўлган. АҚШ президенти Truth Social тармоғида баркас ёки катта моторли қайиққа ўхшаш кичик кема портлаши акс этган қисқа видеони эълон қилди.

«Бугун эрталаб менинг буйруғим билан АҚШ қуролли кучлари ўта хавфли наркокартеллар ва наркотеррорчиларга иккинчи кинетик зарбани йўллади», – дейилади видеога изоҳда.

У «бу ўта зўравон наркокартеллар Қўшма Штатларнинг миллий хавфсизлиги, ташқи сиёсати ва ҳаётий манфаатларига таҳдид солиши»ни қайд этган.

Трамп кемада гиёҳванд моддалар бўлганига далил келтирмаган.

Трампнинг бу баёнотидан олдин Венесуэла президенти Николас Мадуро Венесуэла Америка агрессиясидан ҳимояланишини айтган ва АҚШ давлат котиби Марко Рубиони «ўлим ва уруш ҳукмдори» деб атаганди.

2 сентябр куни ҳам Кариб денгизининг жанубий қисмига жўнатилган Америка кемалари Венесуэла кемасига зарба берганди. Зарба оқибатида кемада бўлган 11 киши ўлдирилган.

Марко Рубио душанба куни яна бир бор АҚШда ушбу биринчи кема Венесуэладан АҚШга гиёҳванд моддалар олиб кетаётган бўлгани ҳақида 100 фоиз ишончли маълумотлар борлигини айтди.

«Нима қилиш керак дейилса, бу қайиқларнинг баъзиларини портлатишни бошлаш керак дейман», – деди Рубио Fox News телеканалига берган интервюсида. У Николас Мадуро АҚШ миллий хавфсизлигига тўғридан тўғри таҳдид солиши, чунки у гиёҳванд моддалар савдосига алоқадор эканини таъкидлаган.

АҚШ Адлия вазирлиги ёзда Николас Мадуро кўп йиллар давомида «Қуёш картели» (Cartel de Los Soles) деб номланган наркокартелни бошқарганини маълум қилганди. АҚШ Мадурони қўлга олишга ёрдам берадиган маълумот учун 50 млн доллар ваъда қилмоқда.

Расмий Каракас бу айбловни қатъиян рад этади.

Николас Мадуро душанба куни АҚШ раҳбариятининг сўнгги ҳаракатлари ва баёнотлари туфайли Венесуэла ва АҚШ муносабатлари бутунлай бузилганини айтиб чиқди.

Якшанба куни журналист Трампдан АҚШ энди Венесуэланинг ўзига зарба беришни бошлаш эҳтимоли ҳақида сўради. Трамп шундай жавоб қайтарган: «Кўрамиз, нима бўларкин».

АҚШ президенти Венесуэла АҚШга бандитлар, наркодилерлар ва гиёҳванд моддалар юбораётганини такрорлади ва биринчи зарбадан кейин Кариб денгизининг жанубий қисмида ҳаракат зичлиги сезиларли даражада камайганини айтди.

Баъзи экспертлар халқаро сувларда кемага зарба бериш халқаро ҳуқуқни бузиш бўлиши мумкинлигини айтишмоқда.

Биринчи зарбадан икки кун ўтгач, Венесуэла Америка эсминеци устидан иккита F-16 қирувчи самолётининг намойишкорона парвози билан жавоб берди.

Трамп бунга жавобан Венесуэланинг америкалик денгизчиларни «хавфли вазиятга қўяётган» самолётлари уриб туширилиши билан таҳдид қилди.

Шанба куни Венесуэла ташқи ишлар вазири Иван Ҳил америкаликларни Венесуэла балиқ овлаш кемасини ноқонуний ҳибсга олишда айблади. Ҳилнинг сўзларига кўра, Америка ҳарбийлари траулер бортига чиқиб, уни саккиз соат давомида ушлаб турган.

Венесуэла ташқи ишлар вазирлиги ҳибсга олишга буйруқ берганлар Каракасда «режимни ўзгартириш мақсадида Кариб денгизидаги уруш эскалациясини оқлаш» учун провокация қилмоқчи эканини таъкидлаган.

АҚШ Британия ва бошқа кўплаб давлатлар сингари Николас Мадурони қонуний сайланган президент сифатида тан олмайди. Венесуэла мухолифати 2024 йил июл ойида бўлиб ўтган сайловларда тўплаган маълумотларга кўра, мухолифатчи номзод Эдмундо Гонсалес катта фарқ билан ғалаба қозонган.