Зеленский Путин билан учрашувнинг ягона шартини айтди

Мен ҳеч қандай шартларсиз учрашишга тайёрман, деди Украина раҳбари.

Фото: Sky News

Украина президенти Володимир Зеленский Британиянинг Sky News телеканалига берган интервюсида АҚШ президенти Доналд Трамп ва Россия президенти Владимир Путин билан уч томонлама ёки икки томонлама форматда «олдиндан шарт қўймасдан» учрашишга тайёрлигини айтди.

«Мен президент Трамп ва Путин билан уч томонлама ёки икки томонлама форматда учрашишга тайёрман... Мен ҳеч қандай шартларсиз учрашишга тайёрман», деди Зеленский.

Шу билан бирга, у Москвага музокаралар учун бормоқчи эмаслигини, бироқ Россиядан бошқа исталган мамлакатда учрашиш таклифларини кўриб чиқишга тайёрлигини таъкидлади.

Аввалроқ Путин Зеленский учрашувга тайёр бўлса, Москвага келиши кераклигини айтганди. Зеленский бу таклифни рад этди ва Путинни Киевга музокараларга чақирди.

16 сентябр куни АҚШ президенти Доналд Трамп Зеленский Украинадаги урушни тўхтатиш учун Москва билан «битим тузиши» кераклигини айтди. Гап айнан қайси битим ҳақида кетаётганига Трамп аниқлик киритмади. Америка етакчиси, шунингдек, Зеленский ва Путиннинг эҳтимолий музокараларида иштирок этишга тайёрлигини маълум қилди.

Тайёрлаган: Сардор Юсупов

#Украина #Владимир Путин #Россия #Володимир Зеленский