Англияда аэропортларга киберҳужумда гумонланган шахс ҳибсга олинди

Буюк Британиянинг Жиноятчиликка қарши кураш миллий агентлиги (NCA) 24 сентябр, чоршанба куни Европанинг бир қанча йирик аэропортларида, жумладан Лондондаги Хитроуда ҳаво қатнови тўхташига олиб келган сўнгги киберҳужумларга алоқадорликда гумонланувчининг ушлангани ҳақида маълум қилди. 40 ёшларда эканлиги тахмин қилинаётган гумонланувчи кеча кечқурун Англия жанубида ҳибсга олинган. Бошқа тафсилотлар ошкор этилмаган.

«Ушбу ҳибсга олиш ижобий қадам бўлса-да, ҳодиса бўйича тергов дастлабки босқичда ва давом этмоқда», деди NCA директори ўринбосари Пол Фостер. Унинг қўшимча қилишича, кибержиноят «доимий глобал таҳдид»га айланган ва Буюк Британия ҳамда бошқа мамлакатларга «катта зарар етказишда» давом этмоқда.

19 сентябр куни кечқурун Берлин, Брюссел, Дублин ва Лондон аэропортларида рўйхатдан ўтиш ва йўловчиларга хизмат кўрсатувчи Collins Aerospace IT провайдерига ҳужум уюштирилди. Шунингдек, у авиация ва космик техника соҳаларида ишлатилади ҳамда ҳарбий мақсадлар учун тизимларни ишлаб чиқади. Компания воқеа юзасидан суриштирув ишлари олиб борилаётганини маълум қилди.

Дастурий таъминотдаги хато аэропорт ходимларини юкни қўлда рўйхатдан ўтказиш ва туширишга мажбур қилди, бу жараённи сезиларли даражада секинлаштирди ва кўплаб парвозлар кечикиши ҳамда бекор қилинишига олиб келди. Брюссел аэропорти маъмуриятига кўра, у ерда рўйхатдан ўтиш ва бортга чиқиш тизимлари ҳам ҳужумга учраган.

Сўнгги йилларда узлуксиз ишлаши кенг қамровли ўзаро боғланган тизимларга боғлиқ бўлган аэропортларга киберҳужумлар сезиларли даражада ошди.