Николя Саркози беш йиллик қамоқ жазосига ҳукм қилинди

70 ёшли собиқ президент 5 йилга озодликдан маҳрум этилган. Бу эса у суд залида ҳибсга олинмаслиги, балки бир ой ичида қамоқхонага жўнатилишини англатади. Бу унга қарши учинчи жиноий иш бўлиб, у илгари ҳам ҳақиқий қамоқ жазосига ҳукм қилинган, аммо бу уй қамоғи билан алмаштирилганди.

Le Mond нашри аниқлик киритишича, ҳукм кечиктирилиши Саркози бир ой ичида прокуратурага чақирилишини, у ерда унга қамоққа олинадиган сана маълум қилинишини англатади. Апелляция бундай эҳтиёт чорасини тўхтатиб қўя олмайди.

Шунингдек, судя Саркозига 100 минг евро миқдорида жарима тайинлаган.

Суд уни фақат битта айблов бўйича айбдор деб топди. Саркози яна учта банд – сайлов кампаниясини ноқонуний молиялаштириш, Ливия давлати маблағларини суиистеъмол қилиш ва коррупцион схемадаги пассив иштирок бўйича ишларда оқланган.

Тергов версиясига кўра, 2005 йилда ўша пайтда ички ишлар вазири лавозимида ишлаган Саркози ва Қаззофий ўртасида «коррупцион келишув» тузилган. Саркозининг сайловолди штаби кампанияни хориждан молиялаштиришга қўйилган тақиқни бузган ҳолда 50 миллион евро олган ва бунга жавобан француз сиёсатчиси Қаззофийга жаҳон аренасидан четлатилишини тўхтатишда ёрдам бериши керак эди.

Ўшанда Саркози сайловда ғалаба қозониб, Франция президентига айланган.

Судя Натали Гаварино ҳукмни эълон қиларкан, Саркози ўз ёрдамчиларига маблағ олиш учун Қаззофий билан боғланишга рухсат бергани ҳақидаги маълумотни келтирди. Бироқ, суд Саркози кампанияни ноқонуний молиялаштиришдан фойда кўргани ҳақида етарли далил топа олмаган.

Саркози барча айбловларни рад этди ва ўзига қарши ишларни сиёсий сабаблар билан боғлиқ деб атади. У апелляция бериши кутилмоқда.

Иш бўйича тергов 2013 йилда, Муаммар Қаззофийнинг ўғли Саиф ал-Ислом Саркозини отасининг пулларидан сайлов кампаниясини молиялаштириш учун фойдаланганликда айблаганидан икки йил ўтиб бошланганди.

Айблов қисман кўп йиллар давомида Франция ва Яқин Шарқ давлатлари ўртасида воситачи ролини ўйнаган франко-ливанлик тадбиркор Зиёд Такиэддиннинг кўрсатмаларига асосланган эди.

Ишда Саркозининг ўзидан ташқари яна 11 нафар айбланувчи иштирок этмоқда: уларнинг баъзилари айбдор деб топилган, бошқалари эса оқланган.

Бу 2007-2012 йилларда Франция президенти бўлган 70 ёшли Саркозига қарши учинчи суд жараёни бўлди.

2021 йилда у коррупция ва савдога таъсир қилишда айбдор деб топилиб, бир йилга озодликдан маҳрум этилганди, кейинроқ икки йиллик шартли қамоқ жазосига алмаштирилган – Николя Саркози қамоқ муддати эълон қилинган илк Франция президенти бўлганди. Бошқа бир иш бўйича Саркози 2021 йил сентябр ойида айбдор деб топилиб, шартли қамоқ жазосига ҳукм қилинган. Учала ҳолатда ҳам у ўз айбини тан олмади.