WSJ: Трамп Украинанинг ҳужумга ўтиш режалари ҳақида хабардор қилинди

Зеленский билан учрашувидан олдин Трамп Келлог ва Уолтц билан гаплашган. Улар унга жанг майдонидаги ҳозирги вазият, шунингдек, Киевнинг Америка разведкаси кўмагини талаб қиладиган яқинлашиб келаётган ҳужуми ҳақида маълумот берди, деб ёзади WSJ.

Фото: Глеб Гаранич / Reuters

АҚШ президенти Доналд Трамп Украинанинг Америка разведкаси маълумотлари талаб қилинадиган ҳужум уюштириш режаси ҳақида хабардор қилинди, деб ёзади The Wall Street Journal икки манбага таяниб.

Нашрнинг ёзишича, Америка раҳбари Киевга Америка қуролларини сотишга рухсат беришда давом этмоқда, бироқ улардан Россия ҳудудига зарбалар бериш учун фойдаланишни чеклади. Июл ойида Трамп Украинага узоқ масофага учувчи ракеталарни етказиб бериш режаси йўқлигини маълум қилиб, Украина президенти Володимир Зеленский «Москвани нишонга олмаслигини» қўшимча қилган эди.

Киевда Американинг ATACMS ракеталари бор, улар учиш масофаси 300 км. Ўтган йилнинг кузида АҚШ собиқ президенти Жо Байден Россия ҳудудига зарба беришда Американинг узоқ масофали ракеталаридан фойдаланишга қўйилган чекловларни бекор қилган эди. Украина Курск, Брянск, Белгород ва Ростов вилоятларига зарба беришда улардан бир неча бор фойдаланган. Россия президенти Владимир Путиннинг айтишича, Украинанинг Россияга узоқ масофали қуроллар билан зарба беришига рухсат бериш «НАТО давлатлари у билан урушаётганини» билдиради.

Сўнгги кунларда БМТ Бош ассамблеясида украиналик ҳамкасби билан учрашишдан олдин Трамп бир қанча АҚШ расмийлари, жумладан, Украина бўйича махсус элчи Кит Келлог ва АҚШнинг БМТдаги янги доимий вакили Майк Уолтц билан гаплашди. Улар Оқ уй раҳбарини жанг майдонидаги мавжуд вазият билан таништирди, шунингдек, Америка разведкаси ёрдамини талаб қиладиган Украинанинг яқинлашиб келаётган ҳужуми ҳақида хабар берди, дея маълум қилган газета манбалари.

Тайёрлаган: Отабек Матназаров

#Россия #АҚШ #Украина #Доналд Трамп