Юздаги пардозни ювмасдан ухлаш терини қандай шикастлайди?

Тешиклар (поралар) тиқилиб қолади

Юз терисидаги тешиклар ёки поралар (порекалар) терининг табиий нафас олиш ва ёғ балансини сақлашида муҳим рол ўйнайди. Аммо кундалик ҳаётда улар турли омиллар натижасида тиқилиб қолиши мумкин. Энг кенг тарқалган сабаблар қуйидагилар: пардоз воситалари, юзга суртилган крем ва лосён қолдиқлари, шунингдек, кун давомида ҳаво орқали тушган чанг ва терининг ўз ёғи.

Тешиклар тиқилганида тери нафас ола олмайди, бу эса ҳуснбузар, қора нуқталар ва бошқа муаммоларга олиб келади. Шунингдек, тери ранги хиралашади, юз силлиқлиги камаяди ва тери соғлом кўринмайди. Мазкур муаммонинг олдини олиш учун юзни мунтазам тозалаш, пардоз воситаларини тўғри танлаш ва уларни кечқурун яхшилаб ювиш керак.

Тери тез қаришни бошлайди

Тунда тери табиий янгиланиш ва тикланиш жараёнидан ўтади. Шу пайтда ҳужайралар зарар кўрган қисмларни тиклайди, озуқа моддаларни сўради ва токсинлардан халос бўлади. Аммо юз кечқурун тозаланмаган бўлса, пардоз воситалари, чанг ва теридаги ёғ қолдиқлари пораларни сиқиб қўйиб, ҳужайраларга кислород ва озуқа моддалари етиб боришини тўсади. Натижада терининг тикланиши секинлашади, ажинлар эрта пайдо бўлади ва тери эластиклигини йўқотади. Юзда “чарчоқ ифодаси”шаклланади, тери хиралашади. Шу сабабли, кундалик юз тозалаш одати жуда муҳим ҳисобланади.

Яллиғланиш ва аллергия хавфи

Косметик воситалар таркибида турли кимёвий моддалар мавжуд бўлади. Уларни кечаси юзда қолдирсангиз, тери ушбу моддаларни узоқ вақт давомида ўзига сингдиради. Натижада қизариш, шиш, яллиғланиш, ҳатто аллергик реакциялар юзага келиши ҳам мумкин. Бундай ҳолатлар нафақат терининг соғлиғига салбий таъсир қилади, балки юзнинг табиий янгиланиш жараёнини секинлаштиради. Шу сабабли, кечқурун юзни яхшилаб тозалаш, пардоз қолдиқларини ва чангни олиб ташлаш жуда муҳим.

Кўз атрофидаги нозик терига зарар

Кўз атрофидаги тери жуда нозик ва сезгир бўлиб, унга алоҳида эътибор керак. Туш ва тенни ювмасдан ухлаш юзнинг ушбу қисмида турли муаммолар пайдо бўлишига олиб келади. Аввало, киприклар ифлослик ва пардоз қолдиқлари таъсирида синиши ёки тўкилиши мумкин. Шу билан бирга, кўз шиллиқ қавати тирналиб, қизариш ҳамда ноқулайлик пайдо бўлади. Эрталаб уйғонганингизда эса шишлар ва қора ҳалқалар катталашади, кўзлар чарчаган кўринади. Бу нафақат эстетик жиҳатдан ноқулай, балки кўз атрофидаги терининг соғлиғига ҳам салбий таъсир қилади. Шу сабабли, кечқурун кўз атрофини махсус ювиш воситалари билан тозалаш, макияж қолдиқларини олиб ташлаш ва терини намлантириш жуда муҳимдир.