Инфографика: Қуёш тизими чўққилари олдидаги митти Эверест

Эверестга чиқиш, албатта, таъсирли бўлса-да, Ердаги энг баланд тоғ аслида Қуёш тизимининг чўққилари олдида жуда кичик бўлиб кўринади.

Яқинда Black Hole ҳамжамияти аъзолари Эверест билан солиштирганда Қуёш тизимидаги энг баланд тоғларни кўрсатадиган визуал инфографикани тақдим этди. Улардан энг баланди Фарсида провинциясида (сайёра экватори яқинида) жойлашган Марсдаги сўнган вулқон Олимпдир. У мутлақ ва нисбий баландлик бўйича рекорд ўрнатади. Тасаввур қилиш қийин, лекин бу улкан стратовулқон ўз пойдеворидан 26 километр баландликка эга, бу Ердаги энг баланд тоғ - Мауна-Кеа вулқони нисбий баландлигидан тахминан 2,5 баравар кўп, у пойдеворидан 10,2 километр баландликка эга. Олимпнинг диаметри тахминан 540 километрни ташкил қилади.

Иккинчи ўрин Веста астероидидаги Реи Силвия кратери марказидаги тоғга тегишли. Кратернинг ўзи диаметри 475 километрдан 500 километргача ва Қуёш тизимидаги энг чуқурларидан бири ҳисобланади: у 20-25 километр чуқурликка эга. Унинг марказий ҳудудида баландлиги тахминан 22–23 километр ва диаметри тахминан 180 километр бўлган тоғ кўтарилиб, Марсдаги Олимпдан кейин Қуёш тизимидаги иккинчи энг баланд чўққидир.

Учинчи ўринни экватор бўйлаб Сатурн йўлдоши Япетни ўраб турган ҳалқа шаклидаги тоғ тизмаси «Япет девори» эгаллади. Унинг баландлиги 13 километрга, кенглиги 20 километргача ва узунлиги тахминан 1300 километрга етади.

Таъкидлаш жоизки, бу тўлиқ рўйхат эмас: Марсда Эверестдан анча баланд бўлган кўплаб сўнган вулқонлар бор, бироқ улар бу инфографикага киритилмаган.