Трамп Исроилда нутқ сўзлади: «ҲАМАС қуролсизланишга рози бўлди, уруш тугади»

АҚШ президенти Доналд Трамп 13 октябр куни Исроил парламентида (Кнессет) нутқ сўзлади ва Исроилга ташрифини ўзи учун катта шараф деб атади. Унинг нутқи олқишлар билан кутиб олинди.

Трамп сўзларига кўра, ҲАМАС тинчлик режасида кўзда тутилган қуролсизланиш бандини бажаради. «ҲАМАС қуролсизланиш режасини бажаришга рози бўлди», деди Америка етакчиси. Шунингдек, Трамп Ғазо секторидаги можаро тугагани ҳақида баёнот берди: «Уруш тугади».

Кнессет спикери Амир Охана: «Биз спикер Майк Жонсон билан биргаликда бутун дунё етакчиларини келгуси йилда Тинчлик учун Нобел мукофотига номзодингизни илгари суришга чақирамиз. Сиздан муносиброқ одам йўқ, президент Трамп», деди.

Исроил мухолифати етакчиси Яир Лапид: «Бу дунёда эзгулик ва зулм бор. Қачонки сиз ҲАМАС, Ҳизбуллоҳ ёки Эрон режими тарафида бўлсангиз, демак сиз зулм тарафидасиз. Исроил тарафида бўлсангиз, адолат тарафидасиз», деди.

Кнессет аъзолари Айман Одех ва Офер Кассив Трамп нутқи пайтида «геноцид» ёзуви туширилган плакатни кўтарганидан кейин залдан чиқариб юборилди.

Трамп: «Биз Исроилга кўп қурол бердик. Биби (Нетаняҳу) менга қўнғироқ қилиб, у ёки бу қуролни сўради - мен уларни тайёрладим. Улар энг яхши ва сиз улардан яхши фойдаландингиз. Бу тинчликка олиб келди», деди.

Трамп: «Ғазони зудлик билан демилитаризация қилиш режасини бутун минтақа қўллаб-қувватлади. ҲАМАС қуролсизлантирилади. Исроил хавфсизлигига энди ҳеч қандай шаклда таҳдид бўлмайди», деди.

Аввалроқ, ҲАМАС гаровда тирик қолганларни Исроилга топширган эди: биринчи гуруҳга 7 киши, иккинчисига 13 киши киритилган.

Битим шартларига кўра, гаровга олинганлар эвазига исроилликларни ўлдиргани учун умрбод қамоқ жазосига ҳукм қилинган 250 нафар фаластинлик маҳбус, шунингдек, уруш бошланганидан бери ҳибсга олинган 1700 киши Исроил қамоқхоналаридан озод қилиниши керак.