«Титан» сувости кемаси ҳалокатининг сабаби маълум бўлди

АҚШ Транспорт хавфсизлиги бўйича миллий кенгаши (NTSB) 2023 йилда OceanGate компаниясининг «Титан» сувости кемаси билан содир бўлган ҳодиса ҳақида якуний ҳисоботни эълон қилди, деб хабар берди AP.

Машҳур «Титаник» қолдиқларига экспедиция чоғида ёрилган ва беш кишининг ўлимига сабаб бўлган «Титан» сувости кемасининг ҳалокатига муҳандислик хатоси сабаб бўлган.

Ҳисоботда айтилишича, «Титан» сувости кемасини яратишнинг муҳандислик жараёни нотўғри бўлган ва аппарат мустаҳкамлик талабларига жавоб бермаган. Шунингдек, компания етарлича синовлар ўтказмагани ва кеманинг ҳақиқий барқарорлигини аниқламагани кўрсатилган.

Аввалроқ, 5 август куни АҚШ Соҳил қўриқлаш хизмати ҳисоботида компаниянинг хавфсизлик тартиблари ўта етарли эмаслиги, эълон қилинган протоколлар ва ҳақиқий хавфсизлик чоралари ўртасида сезиларли тафовутлар борлиги таъкидланган эди.

OceanGate компаниясининг узунлиги тахминан 6,5 метр бўлган «Титан» сувости кемаси 2023 йил 18 июн куни «Титаник» қолдиқларини кузатиш учун Атлантика океанига шўнғиди. Кема ёрилди ва чўкиб кетди, бортдагиларнинг барчаси ҳалок бўлди.

Ҳалок бўлганлар орасида: британиялик миллиардер Хемиш Хардинг, покистонлик тадбиркор Шаҳзода Довуд ва унинг ўғли Сулаймон Довуд, OceanGate асосчиси ва бош директори Стоктон Раш ва француз сув ости кемаси учувчиси Пол Анри Наржоле бор эди.