ҲАМАС яна бир гаровга олинган шахснинг жасадини Исроилга топширди

ҲАМАС яна бир гаровга олинган шахснинг жасадини Исроилга топширди. Ўт очишни тўхтатиш тўғрисидаги келишувга кўра, барча ҳалок бўлган 20 нафар гаровга олинганларнинг жасади 16 октябрга қадар топширилиши керак эди. Аммо Исроил ҳозиргача бор-йўғи 9 та тобут олган.

Фото: Doaa Albaz/Middle East Images/AFP/Getty Images

Европа Иттифоқи ва АҚШ томонидан террорчи ташкилот деб топилган ҲАМАС ҳаракати 17 октябр, жума куни кечқурун яна бир ҳалок бўлган гаровга олинган кишининг жасадини Исроилга топширди. Бу ҳақда Исроил армияси (ЦАҲАЛ) маълумотларига таяниб, AFP ахборот агентлиги хабар берди.

Тобут, аввалгидек, Халқаро Қизил Хоч Қўмитаси (ХҚХҚ) вакиллари орқали топширилди. Улар, ўз навбатида, жасад қолдиқларини ҳозирда Ғазо секторида қолаётган ЦАҲАЛ вакилларига етказган.

Исроил армияси минтақада жанговар ҳаракатларни тўхтатган ўт очишни тўхтатиш келишувига кўра, ҲАМАС нафақат омон қолган 20 нафар гаровга олинганни қайтариши, балки ҳалок бўлган 28 кишининг жасадини ҳам топшириши шарт. Ҳаракат аъзолари тирик исроилликларни 13 октябргача қайтариши керак эди, бу талаб бажарилди. 28 жасадни қайтариш учун уч кун ажратилган, бироқ ҳозиргача Исроил атиги 9 та тобут олган. ҲАМАС вакиллари келишув шартлари «бажарилгани», қолган жасадларни олиб чиқиш учун «махсус техника» зарурлигини даъво қилмоқда.

Шу фонда Исроил мудофаа вазири Исраэл Кац Ғазо секторида жанговар ҳаракатларни қайта бошлаш билан таҳдид қилди. «Агар ҲАМАС келишув шартларини бажаришдан бош тортса, Исроил АҚШ билан келишилган ҳолда жанговар ҳаракатларни давом эттиради», — дея Кац сўзларини келтиради AFP.